Chaču pakłaści kres chvali spekulacyjaŭ i domysłaŭ vakoł apošniaha pasiedžańnia Sojmu Partyi BNF. U paradku dnia studzieńskaha Sojmu byli pytańni palityki j stratehii, ale nie było pytańnia dačynieńniaŭ z
hrupaj A.Milinkieviča. Jano było ŭźniataje samim sp. Milinkievičam, jaki adrasavaŭ Sojmu list z prapanovaj Partyi BNF ulicca ŭ jahonuju frakcyju na budučym Kanhresie demakratyčnych siłaŭ.
Ale jašče ŭ listapadzie Sojm Partyi BNF u poŭnaj adpaviednaści sa Statutam i zdarovym sensam pryniaŭ pastanovu, pavodle jakoj siabry BNF uvojduć u frakcyju BNF, hetaksama jak siabry inšych partyjaŭ i
zhurtavańniaŭ sfarmujuć svaje frakcyi. Na asnovie pradstaŭnictva frakcyjaŭ farmujecca Palityčnaja rada, i było b niedapuščalna, kab u joj nie była pradstaŭlenaja Partyja BNF (hetaksama jak A.Milinkievič, AHP, PKB i inšyja).
Voś i ciapier prapanova pastavić na hałasavańnie pierahlad našaha kolišniaha rašeńnia j pahadzicca z prapanovaj A.Milinkieviča nie była padtrymanaja nivodnym z 40 prysutnych siabroŭ Sojmu (ź ich 17
pradstaŭlali rehijony). Kansensusam vyrašana, što ŭ adkaz na hety list A.Milinkieviča da Sojmu budzie nakiravany list u jahony adras, dzie buduć vykazanyja padziaka za supolnuju pracu padčas minułaj kampanii j zapeŭnieńni, što ŭsie jahonyja zachady ŭ abaronu svabody j niezaležnaści Partyja BNF budzie padtrymlivać i nadalej.
Takim čynam, Partyja BNF była, jość i budzie samastojnym subjektam biełaruskaj palityki. U našym staŭleńni da A.Milinkieviča i da kaalicyi ničoha nie pamianiałasia. My paćviardžajem našuju viernaść kaalicyjnym pryncypam ADS. My rabili j robim usio, kab abjadnanyja demakratyčnyja siły dziejničali pavodle ŭzhodnienaj stratehii (jakuju nastojliva prapanujem) dy kab realna pracavali kaalicyjnyja struktury. Vina Partyi BNF u tym, što my zadoŭha čakali aktyvizacyi Palityčnaj rady i jaje staršyni, a treba było bracca za realizacyju vyznačanych planaŭ samim, i achvočyja b dałučylisia.
Partyja BNF ź vieraśnia viała doŭhija pieramovy z hrupaj A.Milinkieviča pra źmiest i farmat mierkavanaha ruchu "Za Svabodu". Na našuju dumku, heta mieŭ być ruch u farmacie supolnaj kampanii ADS, kaardynavanaj staršyniom Palityčnaj rady. Ale sp. A.Milinkievič prystupiŭ da stvareńnia svajoj
ułasnaj palityčnaj struktury. Hetaje rašeńnie padarvała jahony status jak nadpartyjnaha lidera. Hrupa A.Milinkieviča dahetul nie prapanavała mierkavanym partneram ani kancepcyju arhanizacyjnaha ŭładkavańnia, ani stratehiju takoha kštałtu ruchu. Adnak my hatovyja kaardynavać našuju palityku z hrupaj A.Milinkieviča ŭ rabočym paradku.
Škada, što asobnyja mas-medyja sprabujuć skiravać hramadzkuju ŭvahu nie na stratehičnyja pytańni ciapierščyny, a na nie cikavyja šyrokamu hramadztvu niuansy ŭzajemadačynieńniaŭ palityčnych subjektaŭ, dadajučy im vydumanaj skandalnaści.
