U paniadziełak u Homieli pachavany kiraŭnik abłasnoj arhanizacyi Sacyjał‑demakratyčnaj partyi (Hramady) Siarhiej Staryčenka. U krasaviku jamu b spoŭniłasia sorak hadoŭ.
Hramadzianskaja žonka spadara Staryčenki znajšła jaho ŭ piatli ŭ adnym z pakojaŭ pryvatnaha baćkoŭskaha domu na vulicy Marata Kazieja, dzie jany žyli apošnim časam.
Prakuratura Savieckaha rajonu Homielu raśśleduje hetaje trahičnaje zdareńnie.
Miascovyja aktyvisty daviedalisia pra raptoŭnuju śmierć Siarhieja Staryčenki tolki siońnia. Niekatoryja čalcy demakratyčnaj kaalicyi, u jakuju ŭvachodziła j arhanizacyja Sacyjał‑demakratyčnaj partyi, ličać, što śmierć spadara Staryčenki najchutčej nie źviazanaja ź jahonaj hramadzkaj dziejnaściu.
Apošni raz Siarhiej Staryčenka kantaktavaŭ z uładami letaś 17 śniežnia na pamiežnaj biełaruska‑ŭkrainskaj stancyi Ciarucha, kali viartaŭsia ciahnikom u Homiel z Čarnihava, dzie braŭ udzieł va ŭstanoŭčaj kanferencyi Sajuzu levych partyjaŭ Biełarusi. Tady ŭ jaho j jahonaha adnapartyjca biełaruskija mytniki skanfiskavali materyjały ŭstanoŭčaj kanferencyi Sajuzu levych partyjaŭ, a taksama asobniki brašury pra kult asoby Alaksandra Łukašenki.
