U Mahilovie bolš za šeśćdziesiat čałaviek 19 lutaha adznačyli Mižnarodny dzień rodnaj movy napisańniem dyktoŭki i ŭdziełam u intelektualnym spabornictvie «Biełaruskaje piaciborstva» dla darosłych.
Mierapryjemstvy prachodzili ŭ Pałacy vobłaści. Ich arhanizavali haradzkaja arhanizacyja Tavarystva biełaruskaj movy j tvorčy klub «Natchnieńnie».
Sioleta mahiloŭskija rupliŭcy biełaruskaj movy pisali dyktoŭku piaty raz. Dla jaje arhanizatary abrali vierš «Letapisiec» Maksima Bahdanoviča.
«Vieršu spaŭniajecca sioleta sto hod i jon pryśviečany Mahilovu», — tak arhumentavaŭ vybar tvoru dla dyktoŭki adzin ź jaje arhanizataraŭ Aleh Dźjačkoŭ.
Dyktavała Bahdanovičaŭ vierš nastaŭnica biełaruskaj movy j litaratury Hanna Bandarenka. Vyniki dyktoŭki buduć ahučanyja paźniej.
«Dziakujučy dyktoŭcy Dzień rodnaj movy pačali adznačać u Mahilovie nia tolki ludzi, jakija dbajuć pra biełaruskuju movu, ale j ułada. Letaś kiraŭnik harvykankamu Stanisłaŭ Baradaŭka pavinšavaŭ mahiloŭcaŭ z hetym śviatam. Sioleta hety dzień buduć adznačać admysłovymi imprezami ŭ mahiloŭskich škołach», — zaznačyŭ kiraŭnik haradzkoj arhanizacyi TBM Aleh Dźjačkoŭ.
«Biełaruskaje piaciborstva» dla darosłych prachodziła ŭpieršyniu. Štohod jaho tebeemaŭcy pravodziać dla školnikaŭ va ŭniversytecie imia Kulašova. Darosłyja, jak i vučni, mielisia adkazać na piać pytańniaŭ — pa adnym pa matematycy, hieahrafii, historyi dy biełaruskaj movie j litaratury. Na vykanańnie zadańniaŭ inicyjatar «Piaciborstva» Michaś Bułavacki advioŭ dvaccać piać chvilinaŭ. Pieramoh u intelektualnym spabornictvie siabra TBM Siarhiej Dymkoŭ. Druhoje miesca zaniała vučanica vośmaj klasy Janina Asipcova. Treciaje — Aleh Dźjačkoŭ.
Na prykancy śviatočnych mierapryjemstvaŭ byli ŭručanyja «Paśviedčańni siabra TBM» dziasiatku novym siabram aktyvistam. Prahučali vieršy miascovych paetaŭ. Ź vitańniem i vieršami vystupiŭ pradstaŭnik ukrainskaj dyjaspary horadu Uładzimier Ciščanka.
