Siońnia ŭ Bruseli na pasiedžańni Hieneralnaj rady ministraŭ Eŭrapiejskaha Źviazu na čale z kiraŭnikom MZS Niamieččyny Štajnmajeram adbyłosia hałasavańnie ŭ pytańni zachavańnia sankcyjaŭ ŭ adnosinach da Biełarusi. Vyrašana praciahnuć sankcyi. Dniami adpaviedny prajekt pastanovy padtrymali 27 akredytavanych u Bruseli aficyjnych pradstaŭnikoŭ krainaŭ Eŭraźviazu. Zhodna z hetym dakumentam, sankcyi suprać 34 adkaznych biełaruskich čynoŭnikaŭ na čale z Alaksandram Łukašenkam zachavajucca ciaham najbližejšych 12 miesiacaŭ. Razmova idzie pra dalejšuju blakadu bankaŭskich rachunkaŭ i zabaronu na ŭjezd u krainy Eŭrapiejskaha Źviazu.
Napiaredadni ŭ Berlinie ŭ časie sustrečy pradstaŭnikoŭ parlamenckich kamisijaŭ pa mižnarodnych spravach krainaŭ Eŭraźviazu kiraŭnik MZS Niamieččyny Frank‑Valter Štajnmajer zajaviŭ, što ŭ metach budaŭnictva demakratyi ŭ Biełarusi «jość imknieńnie aktyvizavać dziejnaść niaŭradavych arhanizacyjaŭ i roznych fondaŭ ź biełaruskaj hramadzkaściu».
Kiraŭnik niamieckaha zamiežnapalityčnaha viedamstva taksama paviedamiŭ, što ŭ Miensk budzie nakiravanaja delehacyja ź Niamieččyny, jakaja ciapier staršyniuje ŭ Eŭraźviazie.
Što da siońniašniaha pasiedžańnia ŭ Bruseli, to mnohija naziralniki miarkujuć: Rada ministraŭ Eŭraźviazu biez usiakich ahavorak pahodzicca z papiarednim rašeńniem svaich stałych pradstaŭnikoŭ pry Eŭrakamisii.
U razmovie z «Radyjo Svaboda» siabra kamisii pa mižnarodnych spravach Bundestahu, a taksama pradstaŭnica Niamieččyny ŭ Parlamenckaj asamblei Rady Eŭropy i Parlamenckaj asamblei ABSE Maryluiza Bek skazała, što «inicyjavany praciah sankcyjaŭ – heta zvyčajnaja narmalnaja pracedura, i inicyjatyva chutčej za ŭsio budzie ŭchvalenaja».
«Paśla interviju spadara Łukašenki niamieckaj «Die Welt» usie my ź vialikaj cikavaściu nazirajem za tym, što adbyvajecca ŭ Biełarusi, ci viadzie biełaruski kiraŭnik svaju krainu ŭ bok Švecyi i Niamieččyny, jak jon abiacaŭ, albo hetyja zajavy majuć tolki verbalny charaktar. Sankcyi mohuć być spynienyja ci asłablenyja tolki pry najaŭnaści realnych adpaviednych krokaŭ z boku biełaruskaha kiraŭnictva», – skazała Maryluiza Bek.
Pavodle eŭrapiejskich palitykaŭ, aficyjny Miensk tak i nia vykanaŭ bolšaści patrabavańniaŭ Eŭraźviazu. Razmova pieradusim idzie pra vyzvaleńnie ŭsich palityčnych viaźniaŭ, a taksama pra dostup hramadzianaŭ krainy da niezaležnych ŚMI, pavahu pravoŭ niaŭradavych arhanizacyjaŭ i niezaležnych prafsajuzaŭ, nacyjanalnych mienšaściaŭ, spynieńnie ŭmiašańnia ŭładaŭ u biznes, praviadzieńnie svabodnych i adkrytych vybaraŭ.
Pradstaŭnica Viarchoŭnaha eŭrakamisara Chavijera Salany Chelha Šmid pierakananaja:
«Dalejšy kurs biełaruskaj palityki Eŭraźviazu budzie zaležać ad źmienaŭ sytuacyi ŭ samoj Biełarusi. Niemahčyma havaryć pra surjozny dyjaloh i supracoŭnictva, kali bazisnyja kaštoŭnaści nie padzialajucca».
