Udzielniki hrupy Queen nie buduć vystupać na kancertach z hałahramaj svajho niabožčyka-vakalista Fredzi Merkjury. Pra heta ŭ intervju časopisu Rolling Stone zajaviŭ bubnač kalektyva Rodžer Tejłar.
Idei "ŭvaskrašeńnia" zorak minułaha stali aktyŭna abmiarkoŭvacca ŭ muzyčnym asiarodździ paśla taho, jak u krasaviku na amierykanskim fiestyvali Coachella padčas vystupu Dr. Dre i Snup Doh hledačam była pradstaŭlenaja hałahrama repiera Tupaka Šakura, zabitaha ŭ 1996 hodzie. Hałahrafičnaja vyjava muzyki, stvoranaja kampanijaj Digital Domain Media Group Inc., vykanała razam z žyvymi kalehami dźvie kampazicyi.
Pośpiech akcyi imhnienna sparadziŭ siarod miełamanaŭ sprečki, kaho jašče z pamierłych artystaŭ varta ŭvaskrasić u vyhladzie hałahramy i adpravić na hastroli. Siarod inšych nazyvaŭsia i Fredzi Merkjury.
Tejłar niehatyŭna pastaviŭsia da hetaj idei, zaŭvažyŭšy, što nie chacieŭ by apynucca na adnoj scenie z hałahramaj svajho siabra. Bubnač i hitaryst hurta Brajan Mej, jakija praciahvajuć zajmacca muzykaj, addajuć pieravahu prasoŭvańniu tvorčaści Queen z dapamohaj novych muzykaŭ.
Tak, naprykład, jany sabrali trybjut-hurt Queen Extravaganza, jaki ŭ mai--červieni adpravicca ŭ paŭnočnaamierykanskaje turne.
A sami muzyki majuć namier dać niekalki kancertaŭ u Jeŭropie ź śpievakom Adamam Łambierta. 3 lipienia kalektyŭ vystupić u Maskvie ŭ spartkompleksie "Alimpijski", 7 lipienia -- stanie chedłajnieram polskaha fiestyvalu Rock in Wroclaw, a 11--12 lipienia - daść dva kancerty ŭ Łondanie ŭ zale Apollo Hammersmith, kvitki na jakija ŭžo całkam raskuplenyja.
