Ahienctva ŭnutranaj biaśpieki Polščy (AUB) padazraje šerah imparcioraŭ biełaruskaha dyzielnaha paliva ŭ machinacyjach z PDV. Jak stała viadoma polskaj dziełavoj haziecie Puls Biznesu, AUB užo niekalki miesiacaŭ sočyć za pracesam impartu dyzpaliva ŭ Polšču, u tym liku cieraź Litvu i Łatviju, z naftapierapracoŭčych zavodaŭ u Mazyry i Navapołacku.
Aprača taho, ahienctva praviaraje, ci ŭčyniajuć firmy, jakija handlujuć palivam, što pastupaje z hetych krain, machinacyi z PDV.
Pavodle acenak paliŭnych kancernaŭ, hetyja machinacyi mohuć nanosić polskaj kaźnie ŭron bolš jak na 200 młn. dołaraŭ ZŠA štohod.
Pieršyja surjoznyja sihnały ab mahčymych machinacyjach z PDV z boku firm, što handlujuć biełaruskim palivam, pačali pastupać u AUB u kancy 2011 hoda, paviedamlaje polskaje vydańnie.
«Ź infarmacyi vynikała, što častka firm z pryhraničnych terytoryj, jakija šmat hadoŭ zajmalisia lehalnym prodažam dyzielnaha paliva, pačali demanstravać usio bolš drennyja pakazčyki, a niekatoryja naohuł byli likvidavany», — paviedamiŭ haziecie znajomy sa spravaj aficer AUB.
Ich miescy pačali zajmać firmy, ź jakimi bolšaść kampanij nikoli nie pracavali ŭ hetaj śfiery. Hetyja firmy prapanoŭvali tolki dastaŭku dyzpaliva kančatkovamu klijentu, biez mahčymaści kupli niepasredna na składzie. Ale bolš za ŭsio padazreńniaŭ vyklikała zanadta nizkaja cana na paliva.
Firmy, što prapanoŭvajuć zanadta nizkuju canu, zarablajuć na tym, što nie płaciać PDV, miarkuje surazmoŭca z AUB.
