(Tekst dasłany pres‑słužbaj A.Milinkieviča, nia jość stenahramaj vystupu)
Vitaju vas, volnyja hramadzianie!
Vitaju śmiełych i sumlennych ludziej. Vy sol našaj ziamli, vy tvorcy našaj nacyi. Dziakuj vam, što pryjšli siońnia na Płošču. Dziakuj, što pryjšli z kvietkami, ściahami i transparantami.
Jany chočuć, kab my siadzieli doma. Naša sprava kiravać, vaša sprava pracavać, kažuć jany. Heta našy płoščy, a vy idzicie na bałota na Banhałor, kažuć jany.
Nie! Krynica ŭłady heta my – heta narod. Heta našy płoščy. Heta naša dziaržava.
My śviatkujem 25 Sakavika – Dzień Voli jak najvialikšaje śviata. Tamu što ŭ hety dzień biełaruski narod uziaŭ u svaje ruki adkaznaść za svaju krainu, za jaje niezaležnaść. Sieńnia harantyjaj niezaležnaści moža być tolki demakratyja.
Šmattysiačnuju biełaruskuju Volu siońnia pavinny pačuć i pabačyć z voknaŭ aficyjnaj televizii, jakaja stała chłusić pra «niekalki socien admarozkaŭ», z zvanicaŭ biełaruskich chramaŭ, jakija, stajać na Płoščy Voli, z kabinietaŭ Administracyi prezidenta, jaki ŭžo zabyŭ vučonyja ŭ škole słovy Kalinoŭskaha pra ŭrad dla narodu, a nie naadvarot.
Biełaruś stanie demakratyčnaj. Kali? Pytajucca mianie. Na hetaje pytańnie nie byvaje adkazu. Hałoŭnaje, kab pieramieny adbylisia biez kryvi. Tady pieramieny buduć niezvarotnyja.
Biełarusy nie prymajuć nasilla. U svaim zmahańni za svabodu my nie pralili ni kropli kryvi. Heta mienavita našu kroŭ pralivali. Tak, mienavita našyja ludzi siadziać u turmach.
Lohkija pieramohi byvajuć tolki ŭ kino. Za adzin raz heta nie robicca. Treba raz za razam, miesiac za miesiacam, hod za hodam zmahacca za svaju Svabodu.
Jeŭropa prapanuje nam dapamohu. Jana kaža: nie bojciesia, my padtrymajem vas. Jeŭropa składajecca z małych krain, takich jak Biełaruś. Tam viedajuć canu niezaležnaści. Jany viedajuć, jak niaprosta heta zavajoŭvajecca.
Z nami siońnia deputaty Eŭraparłamientu, našy siabry z usiaho śvietu. Jany pryjechali padtrymać nas. Davajcie skažam im «ščyraje dziakuj».
U mianie pytajucca: chto vyjhraje, a chto prajhraje ad svabody? Ad svabody vyjhrajuć usie. Tut niama nijakaha paradoksu. Navat tyja, chto siońnia baicca svabody — i jany vyjhrajuć ad svabody. Jany jašče ŭspomniać hetyja słovy.
Svaboda — heta ruch ŭ tym liku i Ruch «Za Svabodu». Hetyja pryhožyja dziaŭčyny ŭ pamarančovych biejsbołkach jakraz i pravodziać zapis ŭ Ruch «Za Svabodu»
Biełaruś pačynaje ruch da svabody, Ruch — Za Svabodu!
Pamnažajcie na ksieraksach haziety. Dastavajcie i raskidvajcie ulotki. Pieradavajcie z ruk u ruki filmy, dyski, knihi. Zryvajcie ich prapahandu. Upirajciesia. Trymajciesia svajho. Hučna abo moŭčki pratestujcie suprać kožnaj niapraŭdy, kožnaj niespraviadlivaści.
Chaj kožny z vas napiša piśmo palitviaźniam, našym hierojam. Ja niadaŭna byŭ u Paŭła Sieviarynca. Vitańni stalicy ad mužnaha Paŭła! Svabodu palitviaźniam!
Biełaruskaja Vola aznačaje i Svabodu, i rašučaść. Siońniašniamu biełaruskamu hramadstvu nie chapaje Voli. Voli — rašučaści, i voli — svabody. Tamu siońnia Dzień Voli pavinien stać dniom našaj rašučaści.
Svaboda i rašučaść vymahajuć farmulavańnia kankretnych patrabavańniaŭ da režymu, jakija b zdoleŭ pieraličyć luby aktyvist demakratyčnych siłaŭ, jakija paŭtaryŭ by biez zapinki luby čynoŭnik.
Hetyja patrabavańni:
Svabodu i Niezałužnaść Biełarusi;
Svabodu palitźniavolenym,
Svabodu vybaru!
Svabodu słova!
U hetyja chviliny kala Nacyjanalnaj biblijateki idzie kancert BRSM za Niezaležnuju Biełaruś. Hladzicie: my dabilisia pryznańnia 25 Sakavika — nacyjanalnym śviatam.
Svaboda i rašučaść — heta nie taptańnie na miescy dy słuchańnie pramovaŭ, Svaboda — heta ruch i hety ruch pavinien być bačny asabliva siońnia ŭ Dzień Voli.
Žyvie Biełaruś!