Uładalniki mabilnikaŭ ryzykujuć stać achviarami.
Niadaŭna, adzin z karystalnikaŭ sotavaj suviazi byŭ niepryjemna ździŭleny — vyśvietliłasia, što nahavaryŭ jon ažno na 44 miljony rubloŭ. Za hetyja hrošy na zvyčajnym taryfnym płanie adnaho ź lideraŭ mabilnaj suviazi našaj krainy vy mahli b bieź pierapynku razmaŭlać ź luboj jeŭrapiejskaj krainaj cełych 17 sutak, abo 9,5 sutak ź luboj samaj dalokaj krainaj aproč Jeŭropy i krain SND. Jeŭrapiejskaje radyjo zacikaviła, z kim tak doŭha moh havaryć šerahovy biełaruski ŭładalnik mabilnaha. Vyśvietliłasia, što havaryŭ zusim nie jon, a źniknieńnie hrošaj, pa słovach staršaha refierenta pres‑słužby Upraŭleńnia vajennaj kontrraźviedki KDB Rusłana Pobala, napramuju źviazana z papularnaj siońnia mahčymaściu mieć na adnoj simcy niekalkich apierataraŭ.
«Dla taho, kab zajmieć hetuju kartu, nieabchodna adskanavać sim‑karty apierataraŭ, heta značyć jany skanujucca, i sakretnaja infarmacyja zakačvajecca na silver‑kartu. U dadzienaj situacyi z čałaviekam adbyłosia nastupnaje: u prahramie, jakaja skanuje kartku byŭ zakładzieny virus. Hety virus aktyvizujecca, kali čałaviek vyjazdžaje za miažu i padklučaje pasłuhu «mižnarodny roŭminh». Adpaviedna numaram telefona hetaha čałavieka, kali jon vyjechaŭ na Ukrainu, skarystalisia zusim čužyja ludzi (vierahodniej, praź blu‑tuz) — i chutčej za ŭsio, raspracoŭščyki prahramy, pry dapamozie jakoj skanavalisia kartki».
My pasprabavali razabracca, što heta za pasłuha takaja, z‑za jakoj źnikajuć takija hrošy. U interniecie, jak vyśvietliłasia dastatkova infarmacyi, kab zrabić takuju mulci silvierkartu navat u siabie doma. Praces kłanavańnia zajmaje nie šmat času. Vam nieabchodny prahramatar, jaki razam z dyskam i śpiecyjalnymi formami pad novyja kartki možna kupić nie bolš čym za 80 dołaraŭ. Pry jaho dapamozie kartki skanujucca i ź ich vyciahvajecca dva sakretnyja kody Ki i IMSI, što źjaŭlajucca ŭnikalnymi dla kožnaha karystalnika. Zatym atrymanaja infarmacyja zapisvajecca na bałvanki i vy majecie adnu kartku ź niekalkimi apieratarami. Ale, kali vy robicie heta nie samastojna, to, niebiaśpieka, pa słovach śpiecyjalista adnaho z najbujniejšych sotavych apierataraŭ Antona Cybulskaha, isnuje, navat niahledziačy na virusy.
«Kali čałaviek, jaki zrabiŭ vam kłon kartak, — nie zusim dobrasumlenny, to jon moža zachavać u siabie vobraz hetaj kartki dy zapisać jaho na bałvanku dla svaich patrebaŭ. Potym jon moža karystacca joj, ale tolki ŭ tych vypadkach, kali čałaviek, z kartki jakoha byŭ zrobleny vobraz, na dadzieny momant nie zarehistravany ŭ sietcy, h.zn. u jaho vyklučany telefon abo jon znachodzicca ŭ roŭminhu, adpaviedna ŭ sietcy inšaha apieratara. U takim vypadku možna telefanavać za košt hetaha čałavieka. Sim‑kartu možna adskanavać tolki majučy jaje na rukach, tobiš usie nieabchodnyja dadzienyja niemahčyma pierachapić pa radyjokanałach».
Darečy, pasłuha kłanavańnia kartak absalutna dastupnaja: jana nie zabaronienaja, ale i nie dazvolenaja. Na rynku ci pa abjavie silvierkartu zrobiać za 10‑20 dołaraŭ. I ŭžo vam vyrašać, jak zručniej: mieć troch GSM‑apierataraŭ u adnym telefonie i lohka pieraklučacca pamiž imi abo mieć try telefony dla kožnaha ź ich. Viadoma, pieršy varyjant zručniej, ale časam za jaho davodzicca niamała płacić
