Pravaabaronca,vice-prezident Mižnarodnaj fiederacyi pravoŭ čałavieka Aleś Bialacki u babrujskaj kałonii № 2 zajmajecca ŭpakoŭkaj milicejskich pahonaŭ. Pra heta jon paviedamiŭ u liście pravaabaroncy Taćcianie Raviacy.
«Bialacki pracuje ŭpakoŭščykam. Siarod inšaj pradukcyi kałonii — rukavicy, praściny i hetak dalej — prysutničajuć i milicejskija pahony. Ich Bialacki taksama ŭpakoŭvaje. Voś ja i dumaju: čamu mienavita źniavolenym vyznačana vyrablać milicejskija pahony», — cikavicca pravaabaronca.
Bialacki, pavodle słoŭ Raviaki, ni na što nie skardzicca.«Jon piša hałoŭnym čynam pra toje, jak adbyvaje pakarańnie. Mała piša pra ŭmovy ŭ kałonii i pra zdaroŭje. Listy ad jaho — takija maleńkija spakojnyja natatki pra žyćcio. Naprykład, pra toje, što na terytoryi kałonii žyvuć troje babroŭ, pra jakich jon cikava raspaviadaje», — adznačyła pravaabaronca.
Pavodle jaje słoŭ, Bialacki ciapier «mała čytaje knihi». «Hałoŭnym čynam jon čytaje vypisanyja jamu haziety, adkul daviedvajecca pra toje, što adbyvajecca ŭ krainie. Paśla pracy i haziet na knihi času praktyčna nie zastajecca», — raskazała Raviaka.
U listapadzie minułaha hoda sud Pieršamajskaha rajona Minska pryznaŭ Bialackaha vinavatym va ŭtojvańni dachodaŭ u asabliva bujnym pamiery i pryhavaryŭ jaho da čatyroch z pałovaj hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Padstavaj dla kryminalnaha pieraśledu pravaabaroncy stała najaŭnaść u jaho zamiežnych rachunkaŭ u bankach Litvy i Polščy. Sud nie ŭziaŭ pad uvahu toj fakt, što hrošy, jakija pastupajuć na hetyja rachunki, vykarystoŭvalisia dla dziejnaści zakrytaha ŭ Biełarusi pravaabarončaha centra «Viasna». Taksama sud nie ŭziaŭ pad uvahu toje, što ŭron, jaki nibyta nanios Bialacki, byŭ poŭnaściu pahašany za košt dobraachvotnych achviaravańniaŭ hramadzian.
Aryšt Bialackaha mieŭ šyroki mižnarodny rezanans. Biełaruski pravaabaronca abvieščany viaźniem sumleńnia.
