22 vieraśnia prajezd u hramadskim transparcie ŭ Mahilovie i Breście budzie biaspłatnym pry pradjaŭleńni vadzicielskaha paśviedčańnia.
Jak paviedamiła pres-sakratar Ministerstva pryrodnych resursaŭ i achovy navakolnaha asiarodździa Volha Pancialejeva, takoje rašeńnie pryniali miascovyja ŭłady ŭ padtrymku praviadzieńnia ŭ Biełarusi Dnia biez aŭtamabila. U Babrujsku ŭ hety dzień vyrašana zrabić biaspłatnym prajezd u tralejbusach. U Minsku ŭ padtrymku akcyi ŭ parku Horkaha projdzie viełaprabieh z udziełam supracoŭnikaŭ DAI, pradstaŭnikoŭ respublikanskich orhanaŭ dziaržaŭnaha kiravańnia, ustanoŭ adukacyi i hramadskich abjadnańniaŭ.
Dzień biez aŭtamabila 22 vieraśnia ŭ Biełarusi pravodzicca piaty hod. Usich vadzicielaŭ u hety dzień zaklikajuć admovicca ad vykarystańnia asabistych aŭtamabilaŭ i pry nieabchodnaści pieramiaščacca na hramadskim transparcie. Meta akcyi — źviarnuć uvahu nasielnictva na vialikuju ekałahičnuju prablemu haradoŭ — jakaść atmaśfiernaha pavietra.
Dola aŭtatranspartu ŭ sumarnych vykidach zabrudžvajučych rečyvaŭ u atmaśfieru Biełarusi dasiahaje 72%. U skład vykidaŭ uvachodziać takija taksičnyja kampanienty, jak vokis vuhlarodu, vokis azotu, vuhlevadarody, vokisły siery, złučeńni ciažkich mietałaŭ. Niekatoryja z hetych rečyvaŭ, naprykład ciažkija mietały i asobnyja chłorarhaničnyja złučeńni, stojkija arhaničnyja zabrudžvalniki, nazapašvajucca ŭ pryrodnym asiarodździ i ŭjaŭlajuć surjoznuju pahrozu jak dla ekałohii, tak i dla zdaroŭja ludziej.
Akcyja ŭpieršyniu prajšła ŭ 1997 hodzie ŭ francuzskim horadzie Ła-Rašel, paśla da jaje dałučylisia inšyja harady Jeŭropy. Tolki za adzin dzień praviadzieńnia akcyi ŭ Biełarusi praduchilajecca vykidvańnie ŭ pavietra jak minimum 250 ton zabrudžvajučych rečyvaŭ.
Letaś akcyju padtrymali ad 13% da 24% nasielnictva ŭ roznych rehijonach Biełarusi. Kolkaść aŭtamabilaŭ na darohach źniziłasia ad 8% da 18%. Źnizilisia abjomy spažyvanaha paliva da ŭzroŭniu taho ž dnia tydniem raniej, u pryvatnaści bienzinu — na 12,3%, dyzielnaha paliva — na 10,4%. Było praduchilena vykidvańnie zabrudžvajučych rečyvaŭ u atmaśfieru ŭ abjomie kala 300 ton.
