Na «Bardaŭskaj vosieni» pieramoh hurt «Nielha zabyć»

Ilo&Friends pakazali trejler da filma «Prastytutka» da prajekta «Tuzin. Niemaŭla». A pieramožcam konkursnaj častki staŭ minski hurt «Nielha zabyć».

Nazva hurta «Nielha zabyć» niezdarma vyhladaje litaraturnym pazyčańniem. Muzyki pryznajucca, što nazvu ŭziali ŭ Karatkieviča: tak piśmieńnik nazvaŭ svoj raman, paźniej pierajmienavany ŭ «Leanidy nie viernucca da ziamli». Z muzyčnaha śpiektakla na «Leanidy…» i raspačaŭ hurt svaju dziejnaść u 2009 hodzie. Paźniej muzyki pierajšli na ŭłasny repiertuar, ź jakoha sfarmavaŭsia tematyčny cykł «Miesca mocy». Mienavita jon prynios pieramohu hurtu na «Bardaŭskaj vosieni — 2012» i ciapier maje šaniec być zapisanym u prafiesijnaj studyi.

Praŭda, daŭni siabra fiestyvalu Michał Aniempadystaŭ zaŭvažyŭ, što žury nie mieła adzinaha mierkavańnia nakont pieramožcy.

Lavon Volski bačyŭ u jakaści najlepšych vykanaŭcaŭ hurt Dzivasil, ale jamu daviałosia zastacca pry svaim mierkavańni, bo astatnija siabry žury jaho nie padtrymali. Sa sceny abiedźvie farmacyi vyhladali dobra, adnak stylova ich anijak nie paraŭnaješ. Kali «Nielha zabyć» prynamsi na fiestyvali pakazaŭ schilnaść da miedytatyŭnaj muzyki, to Dzivasil robić akcent na narodnyja śpievy ŭ aŭtarskaj aranžyroŭcy. Tak što niadziŭna, što žury ciažka było pryjści da adzinadušnaha rašeńnia. Byli adznačanyja taksama hurty Dzivasil i Helisa, a ŭdzielnica hurta The Perfect Life Śviatłana Trapuk atrymała śpiecyjalny pryz ad Radyjo Racyja.

Bielski hurt Helisa mała asacyjavaŭsia z bardaŭskaj pieśniaj, ale prymusiŭ paradavacca, što moładź Padlašša ŭsio jašče robić niešta pa-biełarusku. Bo choć «Bardaŭskaja vosień» i zadumvałasia najpierš dla padlašskaj biełaruskaj aŭdytoryi, miascovyja kamandy zaŭsiody tut u mienšaści. Sioleta z 13 kankursantaŭ tolki dva majuć miascovuju prapisku.

Uvohule 19-y fiestyval «Bardaŭskaja vosień» naŭrad ci mocna adroźnivajecca ad papiarednich. Pieravažnaja bolšaść vykanaŭcaŭ dobra znajomaja padlašskaj publicy. Sioleta hrali BosaeSonca, Relikt, Lavon Volski dy Źmicier Vajciuškievič. Pra miascovy Ilo&Friends i havaryć niama čaho — salistka Iłona Karpiuk na fiestyvali prosta svaja. Jaje hurt byŭ zadziejničany na dvuch važnych fiestyvalnych dniach, ale z roznaj prahramaj. U Biełastockaj opiery, dzie prachodziŭ druhi kancert, Ilo&Friends nie tolki syhrali svaje najlepšyja tvory, ale i pakazali trejler da prajekta partała Tuzin.fm «Niemaŭla». Całkam pabačyć niamoje kino «Prastytutka» i pačuć da jaho žyvy akampaniemient u vykanańni zhadanaha kalektyvu možna budzie ŭ Minsku 25 listapada. Taksama viadoma, što Ilo&Friends vystupiać z ekskluziŭnym kancertam u pab-kłubie «Hrafici» 24 listapada.

Badaj, adzinym hurtom-niekankursantam, jaki paŭdzielničaŭ u «Bardaŭskaj vosieni» ŭpieršyniu, staŭ prajekt Hanny Chitryk Sounduk.

Hanna tak zaviała zału, što adpuskać jaje nichto nie źbiraŭsia navat paśla admazki «ŭ nas zakončylisia biełaruskamoŭnyja pieśni». Daviałosia druhi raz vykonvać dziciačuju pieśniu «Čamu?» na słovy Andreja Chadanoviča. Słovy: «Čamu takaja tryndziučaja ŭ navinach viadučaja?» — prosta davodzili abaznanuju ŭ biełaruskich realijach publiku da ekstazu.

Što da inšych cikavostak sioletniaj «Bardaŭskaj vosieni», adznačym, što Źmicier Vajciuškievič prezientavaŭ adrazu dva novyja prajekty — pieśni na vieršy Rafała Vajačka i pieśni na turemnuju tematyku. Pra apošni prajekt śpiavak havoryć, što sam pakul nie viedaje, jak jaho sustrenuć. Supolna z Hienadziem Buraŭkinym jany mieli na mecie stvaryć choć jakuju-niebudź alternatyvu rasijskamoŭnamu šansonu i pryciahnuć da biełaruskaj muzyki novuju aŭdytoryju.

Jak tolki skončyŭsia fest, arhanizatary sa Źviazu biełaruskaj moładzi pačali dumać pra nastupny, jaki budzie ŭžo 20-m pa liku. Treba dumać, što siurpryzaŭ na jubilejnaj «Bardaŭskaj vosieni» budzie jašče bolej.

tuzin.fm

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH