Vartaŭnik aŭtastajanki, jaki zajaviŭ pra źbivańnie milicyjaj, patrabuje advakata

Pažyły vartaŭnik minskaj aŭtastajanki Vasil Saročyk, jaki zajaviŭ pra źbivańnie milicyjaj, admoviŭsia ad udziełu ŭ śledčych dziejańniach biez advakata.

Pra heta paviedamiła namieśnik staršyni infarmacyjna-aśvietnickaj ustanovy «Płatforma» Alona Krasoŭskaja-Kaśpiarovič.

Pavodle jaje słoŭ, pravierku pa zajavie Saročyka ab źbivańni jaho supracoŭnikami milicyi pravodzić upraŭleńnie Śledčaha kamiteta pa horadzie Minsku. 26 listapada supracoŭniki USK pa Minsku praviali apytańnie Saročyka. «Pry hetym mnie jak zakonnamu pradstaŭniku Saročyka nie dazvolili prysutničać pry apytańni. Supracoŭniki SK spasłalisia na niejkija artykuły Kryminalna-pracesualnaha kodeksa, što ja liču niezakonnym. Artykuł 62 Kanstytucyi harantuje prava na jurydyčnuju dapamohu nie tolki advakataŭ, ale i inšych pradstaŭnikoŭ. Kryminalnaja ž sprava pa zajavie Saročyka, nakolki nam viadoma, nie raspačata, tamu ŭźnikaje słušnaje pytańnie, pry čym tut KPK», — skazała Krasoŭskaja-Kaśpiarovič.

Saročyk vyrašyŭ dalej nie brać udziełu ni ŭ jakich dziejańniach biez advakata. «Siońnia pavinny byli pravieści śledčyja dziejańni — typu ekśpierymientu — va UUS Leninskaha rajona.

Saročyk pavinien byŭ iści ŭ kabiniet, pakazvać i raskazvać, jak jaho źbivali. Adnak my tolki siońnia skłali dahavor z advakatam na akazańnie jurydyčnaj dapamohi. I tamu paprasili śledčych pieranieści hetyja dziejańni», — paviedamiła Krasoŭskaja-Kaśpiarovič.

Ciapier, pavodle jaje słoŭ, pra śledčyja dziejańni supracoŭniki SK buduć paviedamlać advakatu.

Nahadajem, padziei adbyvalisia 14 listapada. Pavodle słoŭ Saročyka, u punkt achovy aŭtastajanki pryjšli dva supracoŭniki pravaachoŭnych orhanaŭ, adzin ź jakich byŭ u cyvilnym.

Nie pakazvajučy dakumientaŭ i ničoha nie tłumačačy, jany zahadali vartaŭniku nakiravacca ŭ Leninskaje RUUS. Prykładna hadzinu Saročyk znachodziŭsia ŭ pamiaškańni dziažurnaj častki ŭpraŭleńnia, a zatym jaho adviali na dopyt. Paźniej vyśvietliłasia, što dopyt pravodziła opierupaŭnavažanaja Leninskaha RUUS Bahdanoŭskaja Ž. P. Pavodle słoŭ Saročyka, opierupaŭnavažanaja nadzieła na jaho naručniki i pačała źbivać, patrabujučy pryznacca ŭ kradziažy nadmahilnych plit, jakija zachoŭvalisia na terytoryi aŭtastajanki, a taksama salarki i akumulataraŭ z mašyn. Akramia taho, ad vartaŭnika sprabavali dabicca pryznańnia ŭ tym, što jon pieryjadyčna rabavaŭ kijoski na rynku «Śviełta».

Jak śćviardžaje Saročyk, jaho bili nahami i dubinkami pa hałavie i ciele, da źbivańnia pieryjadyčna padklučalisia inšyja supracoŭniki RUUS. Katavańni supravadžalisia niecenzurnaj łajankaj i pahrozami zabojstva. Kali pažyły čałaviek hublaŭ prytomnaść, jaho ablivali chałodnaj vadoj.

Usio heta doŭžyłasia prykładna šeść hadzin, ale pryznańnia ad Saročyka milicyjaniery nie atrymali. U vyniku ŭ dačynieńni da jaho skłali niejki dakumient, jaki piensijanier padpisaŭ, budučy ŭžo nie ŭ stanie jaho pračytać, i adpuścili dadomu.

Źbity vartaŭnik źviarnuŭsia z zajavaj u prakuraturu Leninskaha rajona Minska i ŭ IAU «Płatforma» z prośbaj dapamahčy. «Płatforma», u svaju čarhu, prainfarmavała pra zdareńnie Hienprakuraturu, MUS i Śledčy kamitet.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH