U Horadni nazirajecca časovaje zacišša: zaplanavanyja da rujnavańnia kamianicy pakul pakinuli ŭ spakoi. Na dumku adnaho ź inicyjataraŭ haradzkoha referendumu, žurnalista Alesia Zaleŭskaha, ułady prypyniła moładź, što ad 4 traŭnia ładzić štodzionnuju vachtu la tych budynkaŭ.
Historyk Andrej Vaškievič mienš aptymistyčny: «Peŭna, dumajuć, što rabić dalej, ale naŭrad ich niešta moža spynić». Historyk miarkuje, što časovy pierapynak vyklikany nie adnym dziažurstvam, a ŭzrosłaj aktyŭnaściu haradžanaŭ uvohule.
Jaho kaleha Janka Lalevič kaža, što z uładami, jak ni ciažka, ale treba havaryć: «My pavinnyja davodzić svaju racyju, pradstaŭlać alternatyŭnaje bačańnie raźviazańnia prablemy». Časam stvarajecca ŭražańnie, što hetyja čynoŭniki navat vierać, što dziejničajuć słušna, kaža jon.
Biantežyć inšaje: na siońnia ŭ Horadni niama kamu prafesijna pravieści archiealahičnyja raskopki na miescach, dzie pracujuć restaŭrataty. Niechta pracuje za miažoj, chtości adyšoŭ ad praktyki, inšy zajmajecca vuzka specyjalizavanaj spravaj, nie źviazanaj z haradzkoj archiealohijaj. Bolš za toje — siońnia nivodzin haradzienski archieolah nia maje adkrytaha lista dla praviadzieńnia raskopak.
Ja. Lalevič adznačaje, što daŭno nia bačyŭ u horadzie takoj aktyŭnaści moładzi. Adnak, na jaho dumku, hetaha niedastatkova. «Horadni terminova patrebnaja kamanda niezaležnych ekspertaŭ — archieolahaŭ, architektaraŭ, acenščykaŭ techničnaha stanu avaryjnych budynkaŭ» — kaža historyk. U ideale heta pavinny być miascovyja admysłoŭcy, jakich nie patrebna papiarednie rychtavać, bo času na heta vobmal. «Praktyka pakazvaje, što časam tak zvanyja avaryjnyja budynki znachodziacca daloka nie ŭ takim kiepskim stanie, jak kažuć aficyjnyja ŭłady» — tłumačyć patrebu ŭ acenščykach techničnaha stanu budynkaŭ Andrej Vaškievič.
Praviadzieńnie kompleksnaj acenki stanu mierkavanych pad znos budynkaŭ moža pastavić pad sumnieŭ plany haradzkich uładaŭ.
Siamion Piečanko
