Taciana Manionak, ahladalnik hazety «Biełorusy i rynok»: Canoj praciahłych pieramovaŭ biełarusy atrymali davoli łahodnyja i prazrystyja ŭmovy pastavak hazu na nastupnyja čatyry hady. Asablivaści miždziaržaŭnych stasunkaŭ nie dazvolać Rasiei ŭ najbližejšaj perspektyvie vystavić ci nie adzinaj na siońnia sajuźnickaj krainie takija patrabavańni. Ukraina ŭžo vyznačyłasia ŭ svaim kirunku, što, zdajecca, niezvarotna. Hetym i tłumačycca takaja pazycyja Rasiei. Biełaruskaje kiraŭnictva pakul nia maje vyrazna akreślenaj kancepcyi napramku raźvićcia krainy. Viadziecca hulnia, handal za lepšyja ŭmovy, i pakul što jon udajecca. Takaja sytuacyja pakul zadavalniaje abodva baki.
Vital Silicki, palitolah: Ukraina atrymlivała z Rasiei tolki 20% hazu, dyj toje kampensavała jaho košt pasłuhami za tranzyt. Tamu ŭ jaje jość usie mahčymaści kančatkova pieraaryjentavacca na inšyja krynicy atrymańnia enerharesursaŭ. Biełaruś na 100% zaležyć ad pastavak rasiejskaha paliva. Tamu ŭ našym vypadku scenar moža być našmat bolš žorstki. Chiba hety cisk nia budzie vielmi vidavočny ciaham času, pokul buduć dziejničać apošnija miždziaržaŭnyja damoŭlenaści. I najchutčej hetym pytańniem budzie zajmacca novaje rasiejskaje kiraŭnictva.
Natalla Tahanovič, zahadčyca sektaru prablemaŭ paliŭna-enerhietyčnaha kompleksu Instytutu ekanomiki Biełarusi: Naša kraina maje vielmi pryvabnaje hieapalityčnaje stanovišča, asabliva heta datyčyć pytańniaŭ tranzytu. Tamu dla nas dačynieńni z Rasiejaj u sfery pastavak paliva buduć u cełym spryjalnyja zaŭsiody.