Z usioj krainy
Ździacinieli
U Bieraści dva maładyja čałavieki, kožnamu pad 30 hod, zabaŭlalisia, kidajučy z balkonu na minakoŭ napampavanyja vadoj prezervatyvy. Para ichnych achviaraŭ dačakała, kali adzin z “chłopčykaŭ” vyjšaŭ pa piva, i zaciahnuła jaho ŭ pastarunak. Jurydyčna kidańnie prezervatyvaŭ z vadoj pa mirnym nasielnictvie kvalifikujecca jak drobnaje chulihanstva (art. 156 KoAP RB).
Kobrynskaja infaprastora
Kobrynskaja kabelnaja televizija “TV SAT” tranśluje 16 kanałaŭ, a nieŭzabavie dadaducca jašče niekalki. Usiaho abanentaŭ “kabelki” ŭ horadzie kala 4 tysiač, a hledačoŭ našmat bolej. Kobrynskaje “TV SAT” planuje stvaryć adzinuju infarmacyjnuju prastoru z mahčymaściu telefanii, internet-pasłuhaŭ dy inšaha servisu.
Hielikopter biaz racyi
Nieviadomyja ŭnačy razukamplektavali šrubalot, jaki naležyć “BiełLesAvija” dy “prypisany” da Pinskaha aeraportu. Złamyśniki raźbili škło ŭ kabinie i skrali adtul radyjostancyju.
Machinatar biaź miežaŭ
U Bieraści źjaviŭsia padazrony małady čałaviek, jaki chodzić pa kvaterach i nazyvajecca supracoŭnikam “Asacyjacyi daktaroŭ śvietu biaź miežaŭ u Biełarusi”. Kaža, što ładzić ankietavańnie. Paśla prośby žycharoŭ pakazać paśviedčańnie nieviadomy chutka źnikaje. U Miniuście takaja “asacyjacyja lekaraŭ” nie zarehistravanaja. Pratačycca ŭ kvatery, badaj, choča niejki aferyst.
I.Chviedarovič, Bieraście
Zasypała žyvym
Na tym tydni ŭ pasiołku Žamčužny la Baranavič abvaliłasia ziamla ŭ karjery. Na biadu tamaka jakraz hulaŭ siamihadovy chłopčyk. Adkapali jaho za jakich 15 chvilinaŭ. Ale dzicio było ŭžo miortvaje.
Vypuścili biełarusaŭ
25 traŭnia apošni zvanok prahučaŭ u Baranavickaj SŠ №20 dla adzinaj tamaka biełaruskaj klasy. Staršynia Baranavickaha TBM Viktar Syryca padaryŭ vypusknikam knihi Arłova, a staršynia haradzkoha BNF Aleś Hrycaviec praśpiavaŭ pad hitaru niekalki pieśniaŭ.
Razumnyja lichtary
Baranavicki harvykankam vydatkuje hrošy dla nabyćcia systemy aŭtamatyčnaha kiravańnia śviatłom. Chutka lichtary na vulicach horadu viečaram buduć reahavać na ruch minakoŭ — sami ŭklučacca pry padychodzie j vyklučacca pa adychodzie ad ich. Ułady horadu miarkujuć takim čynam zekanomić hrošy.
Biaspłatnaja medycyna daražeje
Baranavickija medyki musiać sami zarabić sioleta 30% ad hrošaj, zakładzienych u haradzki biudžet na achovu zdaroŭja. Heta prykładna 4 młrd. rubloŭ. Letaś zamiest zaplanavanych 3% medycyna zdoleła zarabić tolki 2,1% (200 młn.). Bolšaść medykaŭ nia vieryć, što sioleta zmohuć zarabić hetkija srodki: abstalavańnie znošanaje amal na 80%.
Ciapieraka kali vy sami, biez nakiravańnia ad doktara, pažadajecie pravieryć zdaroŭje, daviadziecca płacić. Najtańniej zdać analiz mačy — 121 rubiel, daražej za ŭsio kaštuje kalonaskapija — 19262 rub., ukoł u vienu abydziecca ŭ 538 rubloŭ, u ciahlicu — 376 rubloŭ. Pravierka ščytapadobnaj załozy — 2150, rechakardyjahrama — 8811 rubloŭ.
Pasaładziŭ žyćcio
Małady čałaviek padyšoŭ na baranavickim rynku da handlarki cukram i pažadaŭ nabyć dva miachi. Adno prasiŭ prajści da najbližejšaj kramy j pravieryć vahu. Kala “čornaha ŭvachodu” pakinuŭ pradavačku, a sam pajšoŭ usiaredzinu. Tam skazaŭ, što moža tanna pradać dva miachi cukru. Zabraŭ hrošy j uciok. A rabotniki kramy pajšli na dvor zabirać “svoj” cukar.
Rusłan Raviaka, Baranavičy
Vialiki kłopat
Akcyja “Małym rekam — vialiki kłopat” pačynajecca ŭ Smurhoniach. Planujecca vyčyścić małyja reki Oksnu dy Hierviatku, što ciakuć praz horad. Pačniecca akcyja 1 červienia a 10-j kala vioski Asinaŭka. Dobraachvotnikam abiacajuć humavyja palčatki j boty. Ładzić akcyju Smurhonskaja inspekcyja pryrodnych resursaŭ i achovy navakolnaha asiarodździa.
“Novaja hazieta Smarhoni”
Vola — tolki kałhaśnikam
Žychar vioski Dubrova (Śvietłahorščyna) Leanid Busieł nia byŭ pahrozaju dla hramadzkaha paradku. Źbiraŭ hryby j jahady abo najmaŭsia na pracu da miascovych žycharoŭ. Z taho i žyŭ. Ale niečym nie spadabaŭsia jon tutejšamu milicyjantu i trapiŭ u Śvietłahorski lačebna-pracoŭny prafilaktoryj. U chutkim časie načalnik ŁPP skazaŭ Leanidu, što toj za dobryja pavodziny dy akuratnuju pracu moža być vyzvaleny daterminova. Treba tolki padać adpaviednaje chadajnictva. Kali ž maci-pensijanerka pajšła da staršyni Paleskaha sielsavietu zaśviedčyć chadajnictva, toj joj admoviŭ. Maŭlaŭ, kab Leanid pracavaŭ u kałhasie, sielsaviet chadajničaŭ by, a tak — nie. Voś i biaduje maci, jak vyzvalić z-za krataŭ syna.
Mikoła Busieł, Dubrova
