Naviny haspadarskija
SIAREDNI ZAROBAK u krasaviku skłaŭ 100,4 dalara. Siaredni bankaŭski słužboviec atrymaŭ u minułym miesiacy kala 191,7 dalara, strachavy ahient — 143,6, navukoviec — 119,5, pramysłoviec — 114, nastaŭnik — 88,2, kulturnik — 78, kałhaśnik — 54,5.
PUCIOŬKA Ŭ SANATORYJ uletku budzie kaštavać ad 300 da 500 tys. rubloŭ. Toj, chto atrymlivaje jaje ad dziaržavy, musić spłacić, u zaležnaści ad dachodaŭ, ad 10 da 90% sabiekoštu (letaś było ad 10 da 30%). Za sezon pa dziaržaŭnych pucioŭkach adpačnuć 58 tys. darosłych i 514 tys. dziaciej.
KAMERCYJNYJA LEKAVYJA ŠAPIKI źniknuć ź dziaržaŭnych bolnicaŭ i paliklinikaŭ Miensku da 1 červienia. Štohod kamersanty płacili za arendu paŭmiljona dalaraŭ. A jašče Ministerstva achovy zdaroŭja pastanaviła lačyć niavostryja straŭnikavyja chvaroby nia ŭ bolnicach, a ŭ chatnich umovach — bo niama hrošaj.
192 DZIARŽAŬNYJA PRADPRYJEMSTVY maje akcyjanavać sioleta ŭrad. U śpis trapili mienski “Haryzont”, “Mahiloŭtransmaš”, Bieraściejski elektralampavy zavod, Homielski zavod elektraaparatury.
REJS ŁARNAKA—KIŠYNIOŬ—MIENSK źjaviŭsia, dziakujučy kiprskaj avijakampanii “Aertrans”. Samaloty hetym maršrutam buduć lotać dvojčy na tydzień.
ČEKAVAJA PRYVATYZACYJA praciahniecca da 2005 h. Adnačasova na 17% (da 3,5 tys. rubloŭ) pabolšaje naminalny košt adnaho čeku “Majomaść”. Dahetul hramadzianie Biełarusi pamianiali na akcyi pradpryjemstvaŭ tolki 64% svaich čekaŭ.
NA 5,2% PAMIENŠAŬ impart biełaruskich tavaraŭ u studzieni-krasaviku ŭ paraŭnańni z takim samym letašnim peryjadam, a ekspart vyras na 2,2%. Ahułam tavaraŭ pradali na 1696,4 młn. dalaraŭ, a kupili na 1816,5 młn. Stanoŭčy balans u handli Biełaruś maje z Łatvijaj, Polščaj, Litvoj, Vialikabrytanijaj, Halandyjaj i Kitajem, a admoŭny — z Rasiejaj, Niamieččynaj, Ukrainaj, Italijaj, Francyjaj i ZŠA.
500 BIEŁARUSKICH AŬTOBUSAŬ kupić Maskva. Zrobiać ich na MAZie.
SKASAVAĆ ČASTKU LHOTAŬ na prajezd choča Ministerstva transpartu. Ciapier ilhotami karystajucca 65% pasažyraŭ. Straty ad hetaha letaś skłali 50 młn. dalaraŭ.
ASOBNYJA PRAJAZNYJA na metro i naziemny transpart uviaduć u Miensku z 1 lipienia. Bo kambinavanyja paśviedčańni mnohija siamiejniki dzielać pa častkach: adzin karystajecca “papiarovym” kvitkom dla aŭtobusa, tralejbusa ci tramvaja, a druhi — plastykavaj kartkaj dla metro.
PAZABIUDŽETNY FOND źjavicca ŭ Miensku. Tudy buduć źbirać liški z haradzkoha biudžetu, dachody ad miascovych pazykaŭ, aŭkcyjonaŭ, vystavaŭ i kancertaŭ. Vydatkoŭvać “pazabiudžetnyja” hrošy najpierš majuć škołam, bolnicam i kamunalnym słužbam.
ZAPAZYČANAŚĆ pradpryjemstvaŭ za elektryčnaść z pačatku hodu pabolšała na čverć. Ahułam jana skłała 450 młn. dalaraŭ. Zbolšaha nie płaciać kałhasy i kamunalniki. Enerhietyki sioleta adklučali elektryčnaść 21 tys. pradpryjemstvaŭ — heta ŭ 1,7 raza bolej, čym za taki samy peryjad letaś.
S.I.
