“Hary Poter” u Miensku
Nie dla Čajek i kikbaksioraŭ
“Hary Poter” źjaviŭsia na našych ekranach zapoźniena — amal praz hod paśla vychadu na ekrany Londanu. Zatoje jaho nastupnuju seryju biełarusy ŭbačać adnačasova z suśvietnaj premjeraju.
Historyja pra adzinnaccacihadovaha chłopčyka-siratu Hary Potera, jaki vučycca ŭ patajemnaj Škole čaradziejstva dy mahii j jašče dziciem ździajśniaje podźvihi, začaravała śviet. Tak, byccam aŭtarka knihi sama vučyłasia razam z Hary.
Knihi Džoan Roŭlinh pra Hary Potera byli pryznany najlepšaj dziciačaj čytankaj. Tamu industryja kino źviarnuła na ich uvahu. I nie pamyliłasia: siońnia zbory pieravysili 900 młn. dalaraŭ.
Pieršaja častka — “Hary Poter i filazofski kamień” — była ekranizavanaja Krysam Kałambusam, jaki viadomy svaim kamedyjnym hitom “Adzin doma”. Epizody, kali Hary Poter znachodzicca ŭ svaich tupavatych ciotki j dziadźki Dursel, jakija nienavidziać usialakaje čaradziejstva, krychu nahadvajuć adpaviednyja scenki z papiaredniaha filmu Kałambusa. Navat interjery amal tyja samyja. A voś momant, kali pačynajucca mahičnyja dzivosy j sovy prynosiać Hary Poteru list z zaprašeńniem u Škołu čaraŭnikoŭ, stylizavany pad epizody z Hičkokavych “Ptušak” — choć by scena z kanvertami, što atakujuć “drennych” persanažaŭ.
Film vyznačajecca fajnym padboram aktoraŭ i časam až zanadta aščadnym staŭleńniem da pieršakrynicy. Ad hetaha karcina straciła ŭ dynamicy. Źnik čaroŭny j ciopły humar, zapavolilisia padziei. Epizody ŭ Škole čaraŭnikoŭ nie źnitavanyja ahulnym napružańniem (choć u knizie jano jość) i chutčej nahadvajuć asobnyja atrakcyjony z mahijaj, pryvidami j sovami-paštavikami. Biezumoŭna, treba addać naležnaje šykoŭnym dekaracyjam, kamputarnaj hraficy j masoŭcy.
U hałovach zachodnich dziaciej suśviet Hary Potera zrabiŭsia takim ža realnym, jak suśviet “Zorkavych vojnaŭ” i “Ŭładara piarścionkaŭ”: isnujuć cacki, kamputarnyja hulni, kanstruktary. Adna dziaŭčynka navat pakalečyłasia, skočyŭšy sa stała, kali sprabavała palotać na miatle, jak rabili heta vučni Škoły čaraŭnikoŭ.
Ja raiŭ by zvadzić na hety film dziaciej. Film vykliča zachapleńnie ŭ ich — nia maju sumnievu, što niekatoryja paprosiać, kab vy vadzili ich u hetaje kino jašče a jašče. Darosłym, jakija knihu čytali, budzie pryjemna ŭzhadvać znajomyja epizody. Tyja ž, chto nie čytaje aničoha, akramia televizijnaje prahramy, znojduć nia mienšuju asałodu, asabliva ŭ dynamičnych apošnich bojkach.
Ja nia raiŭ by hladzieć hety film stałym słuchačam pieradačy “Razmova pa sutnaści”, bo jany zrazumiejuć jaho niapravilna j buduć pisać doŭhija skarhi ŭ Kamitet pa spravach relihii. Taksama ja nia raiŭ by hladzieć hety film zaŭziataram kikboksinhu j bojek biaz praviłaŭ, bo jany svaim chrapam buduć pieraškadžać inšym hledačam.
Čamu “Hary Poter” źjaviŭsia na našych ekranach zapoźniena — amal praz hod paśla suśvietnaj premjery? Pryčyna sama banalnaja — hrošy. Košt prakatu novaha filmu adnačasova ź Londanam i Ńju-Jorkam raźličvajecca kampanijami, zychodziačy z cany kvitkoŭ u Londanie j Ńju-Jorku. Dla Biełarusi heta pakul zavialikija hrošy. Ź ciaham času startavaja cana prakatu źnižajecca.
Adrazu paśla źjaŭleńnia “Hary Potera” išli ŭpartyja pieramovy biełaruskaha prakatu z kinahandlovymi arhanizacyjami, ale cana była dla nas praźmiernaju. Urešcie film atrymać udałosia. Pry hetym była “padstrelenaja” j nastupnaja seryja “Hary Potera” — biełarusy jaje ŭbačać adnačasova z suśvietnaj premjeraju.
Andrej Rasinski
