Aleh Tačony
Ranicaj 23 kastryčnika ŭ aeraporcie “Miensk-2” adrazu paśla pryziamleńnia samalotu z Maskvy byli zatrymanyja lidery rasiejskaha Sajuzu pravych siłaŭ Barys Niamcoŭ i Iryna Chakamada.Jany musili brać udzieł u kanferencyi pa biełaruska-rasiejskaj intehracyi. Kala Mižnarodnaha adukacyjnaha centru, dzie pasiedžańnie adbyvałasia, ich užo čakali niekalki dziasiatkaŭ siabroŭ niezarehistravanych arhanizacyj “Małady front” i “Biełaruskaja partyja svabody”, jakija ładzili antyintehracyjny pikiet. Rasiejskuju delehacyju zakidali jajkami - voś i dumaj, kamu bolš nie pašancavała: departavanamu Niamcovu ci ŭsim astatnim.
Presavaja słužba MZS śćviardžaje, što “antyniamcoŭskaja
specaperacyja” KDB pravodziłasia pa ananimnym telefanavańni. Byccam by a siomaj
ranicy nieviadomy papiaredziŭ, što rasiejski palityk budzie vieźci hrošy biełaruskaj
apazycyi. Adnak kiraŭniki SPS kažuć, što biełaruskija specsłužbisty lacieli razam
ź imi ŭ samalocie z Maskvy i što akcyja była dobra splanavanaja. Niezrazumieła, ci
sapraŭdy kanfiskavanyja 50 tys. dalaraŭ i “padryŭnaja litaratura” (h.zn. vydańni
SPS) naležali Niamcovu. I jon, i Chakamada ad hrošaj admaŭlajucca i śćviardžajuć,
što im pački padkinuli ŭ aeraporcie. Kamentatar BT źjedliva zajaviŭ, što hetyja 50
tysiač pojduć na pabudovu Nacyjanalnaj biblijateki…
Jak paviedamlaje presavaja słužba KDB, była pastanova pra departacyju tolki Barysa Niamcova (“niepažadanaj asobaj” u Biełarusi jon staŭ jašče kolki dzion tamu, što paćviardžaje padrychtoŭku biełaruskaha boku da jahonaha pryjezdu), a Iryna Chakamada viarnułasia ŭ Maskvu pa ŭłasnaj voli. Supracoŭniki specsłužbaŭ advieźli ich u aeraport “Miensk-1” i pasadzili ŭ rejsavy samalot, jaki lacieŭ u Maskvu. Ciapier rasiejskamu palityku zabaronieny ŭjezd na terytoryju našaj krainy, bo jon abvinavačvajecca ŭ “naniasieńni škody nacyjanalnym i dziaržaŭnym intaresam Respubliki Biełarusi”.
Mienskija padziei vyklikali dyplamatyčny skandał. Pra svaju niezadavolenaść dziejańniami biełaruskich uładaŭ vykazalisia rasiejskaje MZS i ŭrad. Jašče bolš vostrymi byli kamentary Niamcova i Chakamady, upeŭnienych, što “režym Łukašenki ŭ ahonii”. Ź biełaruskaha boku reakcyja roznaja: Anatol Labiedźka vybačyŭsia pierad rasiejcami za incydent u mienskim aeraporcie, Alaksandar Dabravolski ličyć, što zdareńnie budzie mieć “nehatyŭnyja nastupstvy” dla Biełarusi. Miž tym, paspalitaje hramadztva ciešycca tak, niby heta biełaruskija chakieisty pieramahli rasiejcaŭ. Paśla viekavych kryŭdaŭ kožnaje prynižeńnie Maskvy ŭsprymajecca z dolaj złaradnaści. …A šumu ŭ śviecie! Ź Biełarusi vyhnali rasiejcaŭ. Heta vam užo nia White Russia, jakaja - taksama Rasieja.
Heta Jelcyn moh zatelefanavać i skazać: Alaksandar Ryhoravič, raźbiarysia, navošta hety skandał. Pucin tak nia moža. Jon siadzić u svaim akopie i navat dapuścić nia moža paluboŭnaha rašeńnia! Chałodnaja vajna prezydentaŭ dasiahnuła apahieju. Stała jasna: biełaruskaje kiraŭnictva i asabista Alaksandar Łukašenka nie źbirajucca maŭkliva i biaździejna čakać novych prapanovaŭ pa intehracyi z Maskvy. Departacyjaj Niamcova rasiejskamu boku było prademanstravana, što Łukašenka nie demaralizavany, što jon zdolny na svaju hulniu, raźličanuju ŭ tym liku i na levy rasiejski elektarat. Biezumoŭna, pieradusim heta była asabistaja pomsta Barysu Niamcovu za jahonyja abraźlivyja vykazvańni na adras A.Łukašenki, ale heta taksama i adkaz tamu rasiejskamu palityku, jaki ŭmieje “adździalać much ad katletaŭ”. Faktyčna, A.Łukašenka adnym udaram zabiŭ niekalkich zajcoŭ: adpomściŭ rasiejcam za svaje kryŭdy, sapsavaŭ nastroj biełaruskim partneram SPS dy zrabiŭ vydatny padarunak biełaruskim pravym, vystupiŭšy ź imi ŭ hety dzień “adzinym frontam”.
Tamu nia treba ździŭlacca, što ŭviečary 23 kastryčnika BT pakazała siužet ź pikietu, dało słova Paŭłu Sieviaryncu i Siarhieju Vysockamu. Asabliva padkreślivałasia, što moładź pratestuje suprać handlu niezaležnaściu, jaki, na ich dumku, naładzili apazycyjnyja palityki dy ich rasiejskija kalehi. Kiraŭniku AHP Anatolu Labiedźku, naprykład, pikietoŭcy sabrali hrošy na kvitok da Maskvy, jakija jon, adnak, pryniać admoviŭsia.
Adnak i tut Łukašenka zastaŭsia vierny sabie j toj babci, jakaja nadvoje varažyła: paśla pikietu Sieviarynca, Vysockaha dy jašče dzie-kaho z zanadta aktyŭnych pazabirali ŭ pastarunak.
A viečaram čačency zachapili 900 hledačoŭ miuzykłu “Nord-Ost”. Ich patrabavańnie - spynić vajnu. Dzień 23 kastryčnika staŭ čornym dniom Rasiei. Dźvie takija aplavuchi Rasieja budzie pamiatać doŭha.
