10 Lipienia 2003
PDV pamienšaje, harełka padaražeje
Naleta ŭrad prahnazuje siaredniehadavy kurs dalara na ŭzroŭni 2390 rub. Heta praduhledžvaje prajekt asnoŭnych napramkaŭ dziejnaści ŭradu na 2004 h. u halinie biudžetna-padatkavaj palityki. Prajekt biudžetu na 2004 h. praduhledžvaje taksama źnižeńnie padatku na dadanuju vartaść ad 20 da 18% pry adnačasovaj admienie 10%-je lhotnaje staŭki PDV. Padaražeje harełka: staŭki akcyzaŭ na jaje buduć padvyšanyja.
Kabiakoŭ va ŭpravie Nacbanku
Ukazam prezydenta vice-premjer ministar ekanomiki Andrej Kabiakoŭ uviedzieny va ŭpravu Nacbanku. Raniej ad uradu ŭ jaje ŭvachodziŭ ministar finansaŭ M.Korbut.
Źniziłasia zdabyča nafty
Za pieršaje paŭhodździe ŭ Biełarusi zdabyli 900 tys. tonaŭ nafty — na 2,6% mienš, čym za pieršuju pałovu 2002 h. Pavodle planu, da kanca hodu «Biełaruśnafta» musić zdabyć miljon i 804 tys. t nafty, ale nasamreč vyjdzie na 24 tys. t mieniej: nie chapaje hrošaj, kab raźviedvać novyja radoviščy.
U Polšču na parapłavie
Nieŭzabavie pamiž Biełarusiaj dy Polščaj možna budzie padarožničać na karabli. Transpartniki dźviuch krainaŭ planujuć naładzić vodny turystyčny maršrut, jaki ŭ perspektyvie daść mahčymaść płavać navat u Niamieččynu. Ale śpiarša my musim pabudavać šluz na płacinie ŭ Bieraści koštam 10 młn dalaraŭ. Palakam ža daviadziecca ačyścić rečyšča Visły dy Buhu.
Ukraina abmiažoŭvaje impart cukru ź Biełarusi
Ukraina vyklučyła cukar-syrec z režymu svabodnaha handlu z našaj krainaj. Ciapier jaho možna budzie pradavać va Ŭkrainu tolki praz aŭkcyjon na tavarnaj biržy. Biełaruś spadziajecca pradavać hatovy cukar, vyrableny z syrcu, u Rasieju. Ale abiacanaj jašče letaś kvoty na impart cukru ŭschodnija susiedzi dahetul nia vyznačyli.
Tak supała, što amal adnačasova Aŭstralija, Brazylija i Tajland padali ŭ trybunał Suśvietnaj handlovaj arhanizacyi na Eŭraźviaz, vinavaciačy jaho ŭ niedazvolenym subsydyjavańni vytvorčaści i ekspartu cukru.
Šapikam žyć da žniŭnia
Kamercyjnyja šapiki ŭ Miensku pačnuć masava zdymać tolki ad 1 žniŭnia. Harvykankam planavaŭ raspačać «začystku» jašče 1 lipienia, ale pradprymalniki zamitynhavali. Da vosieni na staličnych vulicach zastanucca tolki jatki z harodninaj (jany buduć pracavać ad 1 sakavika da 1 śniežnia), kvietkavyja paviljony dy šapiki, da jakich buduć prybudavanyja prypynki transpartu z daškami.
Novy dyrektar Kamaroŭki
Na Kamaroŭskim rynku novy načalnik: ad 1 lipienia kiravać im budzie Mikałaj Miatlicki. Da hetaha jon uznačalvaŭ Mienski marharynavy zavod. U svoj čas prystupkami karjernaj leśvicy Mikałaja Miatlickaha byli restaran «Paparać-kvietka», kambinat hramadzkaha charčavańnia zavodu «Haryzont», Mienski choładakambinat №2.
Radyjo «Pilot» zamiest radyjo «Styl»
Na častacie 101,2, jakuju ŭ svoj čas skanfiskavali ŭ radyjo «101,2» na karyść BPSM, budzie viaščać «Pilot-FM». Takoje rašeńnie pryniaŭ zasnavalnik, na dumku jakoha raniejšy kalektyŭ pracavaŭ «nia nadta efektyŭna».
Stvarajecca metalurhičny chołdynh
Dyrektar Žłobinskaha metalurhičnaha zavodu Mikałaj Andryjanaŭ abvieściŭ, što viadziecca praca pa stvareńni chołdynhu, u skład jakoha ŭvojduć BMZ, Mahiloŭski metalurhičny, Rečycki metyzny zavody i homielskaje AAT «Centralit». Hety krok, skiravany na kancentracyju kapitału, miarkujecca, dazvolić aščadžać na padatkach z pradukcyi, jakoj mianiajucca pradpryjemstvy — udzielniki mahčymaha abjadnańnia.
AK, BiełaPAN, AFN
