Ci moža žančyna ŭznačalić Biełaruś
Na pačatku lutaha hazeta «The Washington Times» nadrukavała natatku pad nazvaj «Demakratyčnyja mary», jakuju potym pieradrukavali mnohija biełaruskija vydańni. Publikacyja tyčyłasia viadomaj mižnarodnaj kanferencyi ŭ Ryzie z udziełam biełaruskaje apazycyi. Hazeta asobna adznačyła vystup na kanferencyi Iryny Krasoŭskaj i pryviała charaktarystyku, zroblenuju adnym ź siabroŭ delehacyi. Jon paraŭnaŭ žonku źnikłaha biznesoŭca z Karason Akina — udavoj zabitaha filipinskaha apazycyjanera, vakoł jakoj zhurtavałasia apazycyja dy skinuła dyktaturu Ferdynanda Markasa. Ab tym, nakolki karektnaje takoje paraŭnańnie i ci možna ŭvohule raŭnać Biełaruś z ekzatyčnym archipelaham, — krychu paźniej.
Tut chaču zaznačyć, što na internet-sajcie adnaje vielmi pavažanaje demakratyčnaje partyi, dzie byŭ źmieščany, pavodle anatacyi, «poŭny pierakład» zhadanaha artykułu, mienavita hety pasaž pra Karason Akina adsutničaŭ. Voś taki prykład džentelmenstva ŭ palitycy. Pakul žančyny vystupajuć u roli achviaraŭ — jak žonki, maci, dočki źnikłych, heta vyklikaje ŭ siaredniestatystyčnaha palityka narmalnuju reakcyju. Jon hatovy vystupać u ich abaronu. Ale jak tolki žančyna demanstruje nia tolki samaachviarnaść i addanaść (niavažna — dzieciam, svajakam albo niejkaj spravie), ale ž rozum, daścipnaść i mocnuju volu, jana adrazu pieratvarajecca ŭ kankurenta. Pryčym kankurenta asabliva niebiaśpiečnaha, pakolki da tradycyjnaha mužčynskaha naboru pazytyŭnych jakaściaŭ dadajucca jašče i jakaści žanočyja, supraćstajać jakim ciažka i ŭ palitycy, asabliva palitykam mužčynskaha połu.
Razvahi pra kankurencyju, adnak, słušnyja tolki ŭ vypadku, kali my havorym pra bolš-mienš narmalnaje sučasnaje hramadztva, u jakim dziejničajuć bolš-mienš adnolkavyja praviły hulni dla ŭsich. Zachodniaje hramadztva inšy raz taksama ciažka byvaje pryznać za narmalnaje, asabliva kali havaryć pra krajnija prajavy feminizmu. Nie ŭdajučysia ŭ acenku feminizmu jak źjavy, skažu tolki, što lubaja forma sehrehacyi — rasavaj, połavaj i h.d. — u narmalnaha čałavieka, ja dumaju, musić vyklikać pratest. Pamiatajecie Orueła — usie žyvioły roŭnyja, ale niekatoryja bolš roŭnyja za astatnich? Kudy važniej zrazumieć, što ŭsie ludzi, najpierš, roznyja, a nia roŭnyja. Heta nie adno i toje ž.
Adnak vierniemsia da palityki.
Poŭny varyjant artykułu hladzicie ŭ hazecie "Naša Niva".
Vital Taras
