Лятучы ўніверсітэт пры падтрымцы грамадскай культурніцкай кампаніі «Будзьма беларусамі» і курсаў беларускай мовы «Мова Нанова» працягвае цыкл лекцый, прысвечаных спадчыне Ігната Абдзіраловіча. Разважаючы над ідэямі, прамоўленымі ў эсэ «Адвечным шляхам», сучасныя філосафы наноў актуалізуюць іх у прасторы сённяшняй Беларусі - тым самым падштурхоўваючы і нас да рэфлексіі нашага жыцця, жыцця нашай краіны паводле створанай Абдзіраловічам сістэмы каштоўнасцей..
30 студзеня ў межах гэтага цыкла філосаф Валянцін Акудовіч прамовіць у Магілёве.
«Творачы зруйнуем» - гэтыя словы канцуюць эсэ Ігната Абдзіраловіча «Адвечным шляхам». Хаця на іх звычайна не звяртаюць увагі, альбо спалохана спяшаюцца забыць. Як жа так! У школках заўсёды вучылі, што кожны творчы акт a priori ёсць цудам, якое адно вялічыць прыўкрасу жыцця, а тут…
Толькі не будзем спехам залічваць нашага хлопца (лічы падлетка) у нігілісты. Бо хаця ў гэтым эсэ яго геніальным суаўтарам ужо была смерць, прамаўляючы «Творачы зруйнуем», ён прамаўляў адну з самых жыццялюбных ідэй, якія я хоць ад каго чуў.
Эсэ пабачыла свет у 1921 годзе ( праз два гады Ігнат памрэ). На тую пару Еўропа і Расійская імперыя апынуліся згамаванымі да астачы сусветнай вайной і шматлікімі рэвалюцыямі. Усюды бяда, смерць ды енк. І ўсё гэта нарабілі самі людзі, каб вызваліцца ад даўно спарахнелых формаў жыцця дзеля ўжо сапраўды «светлай явы»…
Менавіта тады Ігнат, які і сам добра хапануў той калатнечы, кажа: не гарматамі ды нянавісцю трэба руйнаваць аджылае, якое хапае за ногі жывых. Яго трэба руйнаваць ствараючы новае. Тварыць і тварыць, без стомы, як без стомы цячэ рэчка. Адно ў такім разе, магчыма, збыткоўнымі стануцца войны ды рэвалюцыі…
Выглядае быццам і наіўна, але…»
Лекцыя Валянціна Акудовіча «Творачы зруйнуем» адбудзецца 30 студзеня а 15.00 па адрасе: Магілёў, зав. Чкалава, 16 («Кола сяброў»). Уваход вольны!
Пра іншыя лекцыі гэтага цыкла чытайце на сайце Лятучага ўніверсітэта і на старонцы ў facebook.
