president.gov.by
Леанід Заяц зойме пасаду старшыні Магілёўскага аблвыканкама, а Міхаіл Русы будзе накіраваны на пасаду памочніка прэзідэнта — інспектарам па Магілёўскай вобласці. Адпаведныя рашэнні прынятыя сёння Аляксандрам Лукашэнкам па выніках сустрэчы з імі. Чакаецца, што гэтыя рашэнні будуць фармалізаваныя ў найбліжэйшы час, піша БелТА.
Кіраўнік дзяржавы растлумачыў матывы, па якіх названыя чыноўнікі нядаўна былі вызваленыя ад пасад міністра сельскай гаспадаркі і харчавання і віцэ-прэм'ера.
Лукашэнка нагадаў, што за ўсё, што адбывалася ў краіне ў сферы сельскай гаспадаркі, яны неслі персанальную адказнасць. «Пачынаючы ад маіх канкрэтных даручэнняў па пэўных культурах — лён, рапс і іншае — і да тэхналогій у сельскай гаспадарцы і экспарту прадукцыі на іншыя рынкі, — сказаў кіраўнік краіны. — І я папрасіў бы вас яшчэ раз, каб вы не думалі, што гэта нейкі экспромт з-за нейкай фермы ў Сліжах. Слухайце, там ёсць каму займацца фермамі, і яны павінны былі гэтым займацца. Яны цяпер і займаюцца. Гэта справа перадусім кіраўніка гаспадаркі і старшыні райвыканкама».
«Таму не трэба думаць пра тое, што беспарадак на фермах і машынных дварах у гэтым «Купалаўскім» (аграхолдынг у Шклоўскім раёне) прывёў да адстаўкі аднаго і другога», — дадаў беларускі кіраўнік.
Лукашэнка падкрэсліў, што неабходна строгае выкананне тэхналогій і жалезная дысцыпліна: «Я папярэджваў, асабліва вас, Леанід Канстанцінавіч, ні з кім не трэба размаўляць. Усе вельмі шмат кажуць, але мала робяць. Вы гэты фактар не ўлічылі і не ўлічвалі. Тое ж самае тычыцца віцэ-прэм'ера, які быў адказным за Магілёўскую вобласць».
Лукашэнка заявіў, што запрасіў Міхаіла Русага і Леаніда Зайца, каб агучыць прынятае ім рашэнне. «Гэта загад: вы ўдваіх едзеце ў Магілёўскую вобласць, наводзіце там жалезны парадак і паведамляеце мне. Я буду ў вас кожны месяц у Магілёўскай вобласці. Чым змагу, тым дапамагу. Але перш за ўсё вы там пасейце як трэба, па тэхналогіі. І на працягу месяца, калі вам трэба перавесці Магілёўшчыну на ваеннае становішча, як цяпер у «Купалаўскім», пераводзьце».
Самае галоўнае, што запатрабаваў Аляксандр Лукашэнка, — арганізаваць працу ў сельскай гаспадарцы па тэхналогіі: «Прымусьце, навучыце іх дзейнічаць па тэхналогіі. Не можа Магілёўская вобласць плесціся ў хвасце з такімі глебамі, якімі яна валодае. Гэта выдатныя землі».
«Вы як грамадзяне Беларусі мой загад павінны выканаць. Выкарыстоўвайце любыя законныя метады, любы законны сродак, каб там навесці парадак і даказаць, што вы тэхналагічныя і сапраўдныя мужыкі», — рэзюмаваў кіраўнік дзяржавы.
