Кіраўнікі Польшчы, Латвіі, Літвы і Эстоніі выступілі з крытыкай пляну мірнага ўрэгуляваньня ў Грузіі.
Плян быў ухвалены ў Маскве прэзыдэнтамі Францыі Нікаля Сарказі і Расеі Дзьмітрыем Мядзьведзевым.
У сумеснай заяве чатырох прэзыдэнтаў адзначана, што ў пляне нічога не сказана пра павагу да тэрытарыяльнай цэласьці Грузіі. Чатыры краіны таксама заклікалі прыняць Грузію ў НАТО, каб прадухіліць у далейшым любыя акты агрэсіі супраць яе.
Заяву прачытаў у сераду ў Брусэлі прэзыдэнт Літвы Валдас Адамкус.
Тым часам прэм'ер-міністар Турцыі Рэджэп Эрдаган сустрэўся ў Маскве з прэзыдэнтам Расеі Дзьмітрыем Мядзьведзевым і абмеркаваў зь ім сытуацыю ў Грузіі. Эрдаган плянуе сустрэцца ў чацьвер з Уладзімірам Пуціным, а пасьля гэтага выляцець у Тбілісі для сустрэчы з прэзыдэнтам Грузіі Міхаілам Саакашвілі.
