07.06.2011 / 18:17

Разьбяр Мікалай Тарасюк: «Што прэзідэнт робіць, тое я і паказваю» 5

У мінулыя выходныя ў пасёлку Ружаны Брэсцкай вобласці прайшоў фестываль «Ружанская брама», аб якім ужо другі дзень пляткарыць Байнэт. Свята наўрад ці набыло б такую вядомасць, каб не выстаўленыя на ім драўляныя скульптуркі Аляксандра Лукашэнкі. Аўтар гэтых твораў — 79-гадовы разьбяр Мікалай Тарасюк, які з’яўляецца адзіным жыхаром вёскі Стойлы Пружанскага раёна.

Мікалай Тарасюк — лаўрэат Усесаюзнага фестывалю народнай творчасці, а таксама спецыяльнай прэміі прэзідэнта Рэспублікі Беларусь дзеячам культуры і мастацтва «За духоўнае адраджэнне» ў намінацыі «Народная творчасць». Акрамя таго, у сваім доме ён стварыў унікальны музей «Успаміны Бацькаўшчыны», аналагаў якому няма ў Беларусі.

У 2008 годзе адбылася прэзентацыя альбома-манаграфіі «Сялянская экнцыклапедыя ў творах Мікалая Тарасюка», у якой апісаны жыццёвы і творчы шлях народнага ўмельца, аналіз яго твораў і ўтрымліваюцца каляровыя фатаграфіі яго твораў.

Мікалай Тарасюк распавёў, што ў яго калекцыі ёсць тры фігуркі, прысвечаныя кіраўніку дзяржавы. Акрамя таго, ўмелец сцвярджае, што і сам Лукашэнка, і Пётр Пракаповіч, і іншыя прадстаўнікі ўлады гэтыя тварэнні бачылі.

«Ёсць фігуркі і прэзідэнта, і парламента, але я іх не прадаваў, таму што прэзідэнт не прадаецца!», — упэўнена заявіў Мікалай Тарасюк.

Ён распавёў, што ў яго ёсць драўляная скульптура, якая адлюстроўвае выступленне прэзідэнта перад парламентам. «Лукашэнка выступае за трыбунай, але некаторыя слухаюць яго задам або спяць. Вось я бачыў гэта па тэлевізары, я гэта і зрабіў «, — прызнаецца аўтар.

Яшчэ ёсць фігурка, дзе Лукашэнка катаецца на каньках з прадстаўнікамі пружанскай мясцовай улады. Называецца кампазіцыя «Лягчэй на каньках катацца, чым гаспадаркай займацца». У дадзеным выпадку народны ўмелец скардзіцца на працу мясцовых уладаў, маўляў, у іх і іншай працы няма, акрамя як на каньках катацца.

«Я гэта бачыў, я гэта і зрабіў, што ў гэтым дрэннага? У мясцовай улады іншай працы і няма.

Я жыву ў бур’янах, самотны, 48 гадоў раблю скульптуры, а мне не аказваюць ніякай дапамогі. Мяне завезлі на фестываль у Ружаны, выкінулі, як сабаку, нават стала не далі — працы стаялі на траве. Хтосьці камандзіровачныя атрымаў, а я, стары, на спякоце цэлы дзень прастаяў.
І я сказаў, што больш не паеду. Колькі я пражыў, а ніхто нават мой музей не парамантуе», — паскардзіўся Мікалай Тарасюк.

У трэцяй кампазіцыі з удзелам Аляксандра Лукашэнкі беларускі лідар намаляваны ў выглядзе анёла перад шасцю чыноўнікамі, распавёў скульптар. Паводле яго слоў, глыбокі сэнс твора заключаецца ў тым, што прэзідэнт — анёл, а ў парламенце — «матуны», таму што яшчэ нічога не пасеялі, а ўжо ведаюць, які ўраджай збяруць.

«Што ж гэта я дрэнную працу зрабіў? Там нічога дрэннага няма. Няхай кажуць, што хочуць, на прэзідэнта па-ўсякаму кажуць. А я працую адкрыта — што прэзідэнт робіць, тое я і паказваю», — сказаў народны ўмелец ў адказ на рэакцыю беларусаў, якія няправільна расцанілі яго творчасць.

«У мяне гэтыя працы стаяць, я іх не прадаю, ні тут, ні за мяжой. Я зраблю працы са ўсімі — і з Лукашэнкам, і з чыноўнікамі, якія гандлююць народам. А чаму я не магу зрабіць працу і паказаць, што чыноўнікі гандлююць народам?», — дзівіцца аўтар.

0
Студент / Адказаць
07.06.2011 / 18:32
Мне определённо нравиться этот дед!!! Стратегия победы - буквальное исполнение законов!!! http://belpolitics.org/index.php/analytics/society/2355-strategytion.html
0
Nasta / Адказаць
07.06.2011 / 19:16
а цi далека гэта веска дзе спадар Тарасюк жыве? Вельми б хацела яго праведаць, можа нават штосьцi набыць... Цi хто б хацеу далучыцца?
0
Pol / Адказаць
07.06.2011 / 19:27
Цуда-Дзядуля! Дзякуй Вам!
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру