Stopard i Faŭst
Pieranicoŭščyk tekstaŭ Šekśpira Tom Stopard paprasiŭ nie zapisvać našuju razmovu. Vielmi słušnaje było pažadańnie, bo prysutnyja žurnaluhi, kštałtu Zakurejčyka & KO, mocna skazili ŭ svaich paźniejšych zapisach sutnaść vykazvańniaŭ spadara Stoparda. Dramaturh Tom Stopard, jak i kožny, chto pracuje z tekstam, vielmi surjozna stavicca da zapisanaha i nadrukavanaha słova. Inšaja reč — sUčasnyja žurnalisty, jakim, zbolšaha, dastatkova słova skazanaha, słova pramoŭlenaha ŭ elektronnych srodkach masavaj infarmacyi. Voś choć by ŭziać skaz, jaki ja pačuŭ: «My — dramaturhi — padpisali pahadnieńnie z Faŭstam!» Chutčej za ŭsio, Tom-pieralicoŭščyk abmoviŭsia. Pahadnieńnie z doktaram-avanturystam Faŭstam, schilnym da vytančanaj pedafilii, — małavartasny dakument. Miarkuju, Stopard musiŭ skazać pra pahadnieńnie z Mefistofelem, pra zmovu z djabłam. U takim razie, było b lahična zhadać pra mahiły teatralnych dziejačaŭ, što doŭhi čas znachodzilisia za miežami chryścijanskich kładoŭ. Ale ja na svaje vušy pačuŭ pra pahadnieńnie z Faŭstam, jakoha nichto nikoli nie zaklučaŭ, z-za niepatrebnaści, akramia djabła, kaniečnie.
09.09.2005, 12:29
Kaškurevič i kazaki
Patrapiŭ ja pad doždž. Špacyravaŭ z Chviedaram Kaškurevičam pa praspekcie Niezaležnaści, raskazvaŭ pra hieapaetyčny prajekt stvareńnia respubliki Kazakstan sa stanicaju-stalicaju ŭ Rastovie, pra ŭsio jašče kaściumavanuju samaidentyfikacyju kazakaŭ, jakija nia majuć u Rasiei anijakaj aŭtanomii, pra padzieł Rasiei na rasiejski Poŭdzień i rasiejskuju Poŭnač… Havaryŭ-havaryŭ i nie zaŭvažyŭ, što vymak naskroź. Pryjšoŭ dachaty, haračy duš pryniaŭ, harbaty z malinami vypiŭ i spać loh, a ŭ śnie z tym ža ž Chviedaram-dudarom napiŭsia harełki, kab paśla daždžu sahrecca i nie zachvareć. Pračnuŭsia ja ŭ kiepskim stanie, nibyta harełku piŭ nia ŭ śnie, a samoj sapraŭdnaści, i ŭ dadatak — prastužanym pračnuŭsia. Našto było pad vieraśniovym daždžom hulać? Niaŭžo dziela atrymańnia kazakami doŭhačakanaj dziaržaŭnaści?
