Ekanamičnyja vyniki hoda ad Ramančuka: skandał hoda, padzieja hoda, achviara hoda... 5

Navukova-daśledčy centr Miziesa i analityčny centr «Stratehija» padviali ekanamičnyja vyniki 2012 hoda ŭ Biełarusi. «2012 hod stračany jak dla rynačnych reform, tak i dla ŭmacavańnia ciapierašniaj madeli. Ad recesii Biełaruś vyratavali tolki spryjalnyja handlovyja adnosiny z Rasijaj. Lohkija hrošy praz naftachimičnyja schiemy paralizavali siłu voli i siłu charaktaru ŭłady. Jana svaimi rukami viadzie Biełaruś da praciahłaj recesii i eskałacyi šerahu niebiaśpiečnych tendencyj», — robiać vysnovu ich ekśpierty.

Navukova-daśledčy centr Miziesa i analityčny centr «Stratehija» taksama pradstavili svaju viersiju pieramožcaŭ u 15 naminacyjach pa ekanamičnych vynikach 2012 hoda.

Lepšym orhanam dziaržkiravańnia pryznany Kamitet dziaržaŭnaha kantrolu

«za šmatlikija dokazy nizkaj jakaści dziaržaŭnaha kiravańnia; uniosak u baraćbu sa złoŭžyvańniami i karupcyjaj čynoŭnikaŭ; faktyčnyja paćviardžeńni tezisa pra nieefiektyŭnaść dziaržaŭnaj ułasnaści».

Horšym orhanam dziaržkiravańnia staŭ Dziaržaŭny kamitet pa majomaści «za sadziejničańnie nacyjanalizacyi; dapamahańnie ŭ parušeńni pravoŭ ułasnaści; saŭdzieł u zamarozcy pryvatyzacyi i parušeńni dyrektyvy № 4 pa raźvićci arendnych adnosin».

Skandałam 2012 hoda nazvana nacyjanalizacyja kandytarskich fabryk «Spartak» i «Kamunarka»,

padziejaj hoda — stvareńnie kitajska-biełaruskaha industryjalnaha parku, što praduhledžana ŭkazam prezidenta № 253 ad 5 maja.

Pravałam hoda pryznana nievykanańnie płana i abaviazacielstvaŭ pierad Rasijaj pa pryvatyzacyi dziaržułasnaści na 2,5 młrd. dołaraŭ.

Lepšym zakanadaŭčym aktam hoda nazvany dekret № 6 ad 7 maja «Ab stymulavańni pradprymalnickaj dziejnaści na terytoryi siarednich, małych haradskich pasieliščaŭ, sielskaj miascovaści».

Najhoršym — dekret № 9 ad 7 śniežnia «Ab dadatkovych mierach pa raźvićci drevaapracoŭčaj pramysłovaści».

Hałoŭnym bienieficyjaram hoda pryznany Bank raźvićcia Respubliki Biełaruś pad kiraŭnictvam byłoha vice-premjera Siarhieja Rumasa.

Achviaraj 2012 hoda stali biełaruskija pradpryjemstvy, vymušanyja brać vielmi darahija kredyty ŭ biełaruskich rublach.

Tendencyjaj hoda pryznany rost napružańnia i dysbałansu na rynku pracy: bolš jak 70 tysiač vakansij i «ŭcioki za miažu» kvalifikavanych biełych i sinich kaŭnierykaŭ.

Zahadkaj 2012 hoda stała: «Čamu Alaksandr Łukašenka pryznačyŭ dvuch piensijanieraŭ — svajho pamočnika pa ekanomicy Piatra Prakapoviča i prem'jer-ministra Michaiła Miaśnikoviča — adkaznymi za praviadzieńnie madernizacyi?»

Biźnies-pierśpiektyvaj hoda nazvany viertykalna intehravany drevaapracoŭčy kompleks kampanii «Miebiełajn» i «VMH Industry».

Spažyvieckim kazusam 2012 hoda pryznany tempy rostu zakupak śvininy z Rasii — 18 090% (sa 174 tys. da 31,4 młn. dołaraŭ).

Vytvorčym kazusam pryznany prodaž lehkavych aŭtamabilaŭ u 2012 hodzie tolki ŭ Rasiju na 559 młn. dołaraŭ (za studzień-vierasień).

Cytataj 2012 hoda stała vykazvańnie pasła Francyi Mišela Reniery ŭ lutym: «Našy inviestary zmahli kanstatavać, što biełaruskija čynoŭniki admaŭlali jaŭnaje, i paśla ŭsiaho hetaha stracili davier da vašaha rynku».

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH