Šturm namiotavaha haradka raspačaŭsia pryblizna a treciaj hadziny ranicy i byŭ skončany litaralna za dvaccać chvilinaŭ, usich udzielnikaŭ pratestu zatrymali i advieźli ŭ nieviadomym kirunku - jak vyjaviłasia paźniej, u specpryjomnik-raźmierkavalnik na Akreścina.
3:00
Mahčyma, rychtujecca šturm płoščy: tolki što na płošču padahnali niekalki aŭtobusaŭ. Tut źjaviłasia niekalki dziasiatkaŭ bajcoŭ specnazu. Jany nabližajucca da lahieru.
Padpałkoŭnik tolki što paprasiŭ usich žurnalistaŭ vyjści za łancužok milicyjantaŭ "u metach asabistaj biaśpieki".
Na płoščy źjaviłasia šmat ludziej u cyvilnym.
Ludzi skandujuć "Žyvie Biełaruś!" i "Milicyja z narodam!"
Adčuvajecca vialikaja napružanaść.
Na tym baku praspekta Skaryny (Niezaležnaści) źjaviłasia jašče bolš milicyjantaŭ.
3:07
Rychtujecca šturm lahieru. Na Kastryčnickuju płošču padahnali šeść hruzavikoŭ MAZ i aŭtobusy, poŭnyja specnazaŭcaŭ, u broniekamizelkach, u šlemach i z dručkami.
Žurnalistaŭ nie puskajuć bližej, čym za 50 metraŭ.
Ciapier źjaviŭsia dadatkovy łancuh specnazaŭcaŭ u šlemach.
Uvieś lahier abkružany dvajnym kołam.
Ludzi ŭ im uzialisia za ruki i maŭčać. Im usim zahadali sieści na ziamlu praz mehafon.
Hrukat hruzavikoŭ zahłušaje ŭsio. Milicyjanty niešta abjaŭlajuć u mehafon, ale ničoha nie čuvać tam, dzie stajać žurnalisty.
Dźviery hruzavikoŭ adčyniajucca, ź ich vyskokvajuć specnazaŭcy.
3:10
Pačaŭsia šturm i zatrymańni
Specnazaŭcy ludziej hvałtam viaduć u braniravanyja MAZ'y. Z dvuch bakoŭ stajać pa čatyry mašyny. Ludzi kryčać. Ich zapichvajuć u aŭtazaki.
Usich demanstrantaŭ vielmi chutka zahružajuć u hetyja mašyny. Ludzi supraciŭlajucca. Jany ŭzialisia za ruki. Trymajuć adzin adnaho. Ale ich vyryvajuć pa adnym. U pieršuju čarhu vyryvajuć ludziej z kraju.
3:15
Idzie šturm lahieru, ludziej hruziać u braniravanyja MAZ'y. Try z šaści MAZ'aŭ užo poŭnyja ludziej. Jany, vidać, chutka adjeduć. MAZ'y taksama abkružany milicyjantami, mahčyma, dla taho, kab praduchilić dostup fotažurnalistaŭ.
Ludziej užo supraciŭlajucca nia tak mocna. Niekatoryja sami iduć u kirunku MAZ'aŭ. Na płoščy zastalisia namioty. Ich pakul nie razburyli. Ale ludziej u im užo niama. I ŭsia terytoryja ačeplena milicyjantami.
MAZ'y zaviali ruchaviki i ŭžo adjaždžajuć.
Zamiežnyja karespandenty adznačajuć, što vielmi ciažka rabić fotazdymki. Nad lahieram było vielmi ciomna, a žurnalistaŭ vycisnuli za dva łancuhi milicejsaha kardonu. Z takoj adlehłaści vielmi ciažka było fatahrafavać šturm.
3:25
Šturm amal skončany, usich zatrymali i vyvieźli z płoščy. Lahier staić pusty. Usie šeść mašynaŭ MAZ ciomna-zialonaha koleru, napoŭnienaja ludźmi, pakidajuć płošču.
Ciapier zastajucca tolki aŭtobusy i milicyjanty. I navat jany ciapier źjaždžajuć.
Źjavilisia ludzi ŭ cyvilnym. Jany ahladajuć namioty. Niešta šukajuć u ich.
Padjechaŭ zvyčajny hruzavik. Vidać, u jaho buduć składać usie tyja rečy, što zastalisia na miescy namiotavaha lahieru.
Žurnalistaŭ bližej, čym na 50 metraŭ nie padpuskajuć.
3:32
Aperacyja pa zatrymańni demanstrantaŭ skončana, usich vyvieźli na MAZ'ach, ale miesca pa-raniejšamu niedastupnaje dla presy. Mahčyma, ludzi ŭ cyvilnym chočuć niešta padkinuć u namioty.
Na momant šturmu ŭ lahiery znachodziłasia 460 čałaviek, pieravažna moładź, bolšaja častka – mužčyny. Siarod lideraŭ apazycyi była Valancina Palevikova.
Ciapier namioty raźbirajuć. Usie rečy składajuć u padhnany hruzavik.
Paŭsiul valajucca asabistyja rečy, charčy, baloniki, leki, termasy i plastykavyja butelki. Nivodnaj butelki ad alkaholnych napitkaŭ niama.
Bieł-čyrvona-biełyja ściahi raskinutyja paŭsiul. Ludzi ŭ cyvilnym źbirajuć usie ściahi.
U centry staić manhał, na jakim hatavałasia harbata.
Ciapier na miescy znachodziacca ŭ asnoŭnym tolki žurnalisty. Jany zdymajuć toje, što zastałosia.
3:35
Usie ŭdzielniki akcyi vyviezieny na hruzavikach-aŭtazakach u nieviadomym kirunku. Žurnalistaŭ puścili za kardon. Na miescy zastajucca reštki pałatak, spalnyja miachi, pakunki, pryvatnyja rečy. Supracoŭniki kamunalnaj słužby aperatyŭna prybirajuć usie hetyja rečy – zakidvajuć u hruzaviki. Termasy, baloniki, kampakt-dyski, abryŭki transparantaŭ...
Na hetym miescy ŭsio jašče znachodziacca specsłužby. U lahiery acaloŭ adzin namiot. Na im vyjava "Pahoni" i dźvie ikony Božaj maci.
Na płošču tolki što pryjechaŭ Alaksandar Kazulin. Jaho ščylnym kołam abkružyli žurnalisty.
Amal usie ściahi kanfiskavali milicyjanty i ŭvieźli z saboj. Astatnija rečy źbirajuć zaraz supracoŭniki kamunalnych słužbaŭ.
3:45
U adnoj z zatrymanych na Kastryčnickaj płoščy, žurnalistki "Našaj Nivy" Taciany Śnitko, nie adabrali mabilny telefon, pa jakim jana paviedamiła:
"My nie supraciŭlalisia padčas šturmu namiotavaha lahieru. Spačatku my sieli nie ziamlu i skandavali "milicyja – z narodam", a potym zamaŭčali. My moŭčki prosta trymali adzin adnaho za ruki. Nam nie było strašna, bo my hetaha čakali.
Ciapier nas viazuć u MAZje aŭtazaku kudyści za miežy Miensku. Praz maleńkaje vakienca my mahli zbolšaha adsočvać maršrut. Niechta paviedamiŭ, što my jechali pa Cimirazieva, potym pa Arłoŭskaj, ciapier źviarnuli ŭ bok. Vyhladaje, što my ŭžo za horadam.
Niekatorych chłopcaŭ źbili. U ich na tvarach kroŭ. Dziaŭčyn u našym aŭtazaku nie źbivali.
Nas pakul nie rasstralali. My nie panikujem".
