Karotkamietražnaja stužka našaha ziemlaka ŭvajšła ŭ śpis pretendentaŭ na ŭznaharodu Jeŭrapiejskaj kinaakademii, piša «Intex-press».
Dakumientalny film Siarhieja Łaźnicy «List» (2012 hod) — apoviad pra psichijatryčnuju ŭstanovu, raźmieščanuju ŭ starym draŭlanym pamiaškańni. Čorna-biełaja karcina pakazvaje žyćcio biesśviadomych źniavolenych.
«Ja zdymaŭ hetyja kadry ŭ psichijatryčnym špitali ŭ Rasii amal 10 hadoŭ tamu, — kaža Siarhiej Łaźnica. — Kali ŭ papiarednich filmach ja vykarystaŭ tolki atmaśfierny saŭndtrek dla pracy z malunkam, to maim novym filmie «List» dazvalaju huku ŭzmacnić malunak».
U hetym hodzie film «List» užo staŭ łaŭreatam kinapremij. Na 53 Krakaŭskim mižnarodnym kinafiestyvali (Krakow Film Festival) jamu prysudzili premiju «Załaty Cmok» za lepšuju režysuru karotkaha mietra z farmuloŭkaj «za stvareńnie ŭnikalnaha kiniematahrafičnaha sposabu razvažańnia pra žyćcio».
Taksama film «List» atrymaŭ naminacyju na pryz Jeŭrapiejskaj kinaakademii PRIX EFA. Kala troch tysiač členaŭ Jeŭrapiejskaj akademii kino vybieruć lepšy karotkamietražny film-2013, jaki budzie pradstaŭleny na 26-j Cyrymonii jeŭrapiejskaj kinaakademii 7 śniežnia ŭ Bierlinie.
Ciapier Siarhiej Łaźnica pracuje nad hulniavoj karcinaj «Babin jar».
Daviedka «IP»
Siarhiej Łaźnica naradziŭsia 5 vieraśnia 1964 hoda ŭ Baranavičach. Z 1996 hoda zdymaje dakumientalnaje kino. Aŭtar 12 dakumientalnych filmaŭ. U 2010 hodzie hulniavy debiut Siarhieja Łaźnicy «Ščaście majo» byŭ pradstaŭleny ŭ hałoŭnym konkursie MKF u Kanach, a ŭ 2012 hodzie druhaja hulniavaja karcina, vajennaja drama pavodle apovieści Vasila Bykava «U tumanie», taksama zaprošanaja na konkurs Kanskaha fiestyvalu, atrymała ŭznaharodu FIPRESCI .
