 |
Ranicaj u piatnicu na sajcie infarmacyjnaha ahienctva Interfax źjaviłasia infarmacyja, što ŭ pasiołku Sosny kala Abjadnanaha instytuta enierhietyčnych i jadziernych daśledavańniaŭ znajšli skład čornych kapačoŭ z bojeprypasami Druhoj suśvietnaj vajny. Paśla niebiaśpiečnaja znachodka była padarvanaja na poli.
Jeŭraradyjo vyrašyła daznacca, ci pahražała heta biaśpiecy stalicy,tym bolš, što ŭ Sosnach znachodzicca stolki ŭranu, što chopić na piać bomb, jak u Chirasimie. Ale pra niebiaśpiečnuju situacyju supracoŭniki instytutu ničoha nie viedajuć. Pa słovach sakratara hałoŭnaha dyrektara Niny Šapko, nijakaj tryvohi nie było, i instytut pracuje ŭ zvyčajnym režymie.
Nina Šapko: U nas tut niama ničoha padobnaha, kali b skłałasia padobnaja infarmacyja, my b adrazu ž paviedamili ŭ MNS. Nu, niama ničoha! Ad vas upieršyniu ja čuju pra heta i nie viedaju ničoha pra materyjał u Internecie ab bojeprypasach, ale zaraz zajdu na sajt i pahladžu. Darečy, miascovaje radyjo pracuje lepiej za ŭsiakich tam karespandentaŭ i chutčej raspaŭsiudžvaje infarmacyju. Kali b było niešta padobnaje, užo ŭsie Sosny stajali b na vušach, a tak u nas cišynia, i nichto ničoha nie viedaje.
Namieśnik dyrektara pa kantrolna‑prapusknym režymie Abjadnanaha instytuta enierhietyčnych i jadziernych daśledavańniaŭ Vasil Sianievič taksama ŭpieršyniu pačuŭ ad Jeŭraradyjo pra toje, što sapiory raźminirvali Sosny pad bokam schovišča radyjacyi. Na temu, jak pracuje instytut u nadzvyčajnych situacyjach, Vasil Vasiljevič admoviŭsia razmaŭlać.
Vasil Sianievič: Navošta vam viedać pra našyja dziejańni pa tryvozie? Nu, sami padumajcie?
Jeŭraradyjo patelefanavała načalniku ŭpraŭleńnia infarmacyi i pa suviazi z hramadskaściu MNS Kaciarynie Samusienkavaj‑Šelehavaj, kab udakładnić infarmacyju. Akazałasia, što skład z bojeprypasami sapiory padraździaleńnia «Ałmaz» vyvieźli ŭ pole i padarvali. Na pytańnie, čamu pra heta nie viedajuć supracoŭniki instytuta, bo jany pavinny byli prymać niejkija dziejańni ŭ vypadku zdareńnia, Kaciaryna Dźmitryjeŭna spakojna zaŭvažyła.
Kaciaryna Samusienkava‑Šelehava: Bačycie, jak adpracavali — nikoha navat nie pachvalavali. Kaniešnie, pahroza jość zaŭsiody, ale kali heta možna zrabić, kab nie padymać lišniuju paniku i nie chvalavać ludziej — my hetaha nie paviedamlajem.
