U Biełarusi startavaŭ Suśvietny tydzień pradprymalnictva. Aficyjnaja cyrymonija adkryćcia sieryi mierapryjemstvaŭ adbyłasia viečaram 18 listapada ŭ biźnies-kłubie i startap-chabie IMAGURU, jaki pačaŭ pracavać u hety ž dzień.
Arhanizataram Suśvietnaha tydnia pradprymalnictva ŭ Biełarusi tradycyjna vystupaje «Centr dziełavoj kamunikacyi BIEŁBIZ» (BEL.BIZ). U jaho miežach 19—21 listapada adbudziecca III Mižnarodny forum pradprymalnictva, na jakim udzielniki abmiarkujuć pytańni ekanamičnaha klimatu ŭ krainie, uzajemaadnosinaŭ pamiž karparacyjami i małym biźniesam, pryvatyzacyi, inviestavańnia ŭ enierhaefiektyŭnyja śfiery, intrapartniorstva, acenki biźniesu i aptymizacyi biźnies-pracesaŭ, inviestycyj u startapy.
Hetymi dniami taksama projdzie sieryja majstar-kłasaŭ, konkursaŭ, hulniaŭ i navučalnych prahram.
Partnioram Suśvietnaha tydnia pradprymalnictva ŭ Biełarusi vystupiła pasolstva Vialikabrytanii. Kiraŭnik dyppradstaŭnictva Brus Baknieł zaznačyŭ, što sioleta temaj tydnia źjaŭlajucca inavacyi, jakija «kampanii pavinny ŭkaraniać, kali jany chočuć kankuryravać na suśvietnym rynku».
Dypłamat padkreśliŭ, što dziaržavy mohuć «bolš aktyŭna stymulavać ŭkaranieńnie inavacyj, daŭšy pradpryjemstvam mahčymaść vykarystoŭvać novyja padychody». Pry hetym ułady pavinny «spakojna stavicca da taho, što ŭ kampanij nie ŭsio moža atrymlivacca», tamu što kali ŭłady zanadta mocna apiakajuć kampanii, to «dla inavacyj nie zastajecca prastory».
«Ja rady, što biełaruski ŭrad imkniecca ablehčyć umovy viadzieńnia biźniesu, i spadziajusia, što Biełaruś budzie palapšać svaje pakazčyki ŭ rejtynhu lohkaści viadzieńnia biźniesu. Ale dobry rejtynh — heta nie ŭsio. Biełaruś maje patrebu ŭ pradprymalnych ludziach, biźniesmienach, jakija mohuć ryzykavać», — padkreśliŭ Baknieł.
Časovy pavierany ŭ spravach ZŠA ŭ Biełarusi Itan Hołdryč zaznačyŭ, što jaho ŭrad i Ahienctva ZŠA pa mižnarodnym raźvićci ŭžo ŭ treci raz padtrymlivajuć praviadzieńnie Suśvietnaha tydnia pradprymalnictva ŭ Biełarusi.
«My rady, što hety tydzień staŭ štohadovym forumam u Biełarusi, — zajaviŭ jon. — Heta jašče adzin krok, jaki zbližaje biełaruskich pradprymalnikaŭ ź mižnarodnaj biźnies-supolnaściu. Jak i ŭ inšych krainach, vialiki patencyjał pradprymalnictva stanovicca istotnym faktaram raźvićcia biełaruskaj ekanomiki. Upeŭnieny, što hety tydzień budzie sadziejničać dyskusii ab prablemach i mahčymaściach, jakija jość u Biełarusi, dla asvajeńnia dynamičnych pierśpiektyŭ pradprymalnictva».
Ministr ekanomiki Mikałaj Snapkoŭ pažadaŭ udačy udzielnicam tydnia.
