Ci zmoža Jeŭramajdan biespavarotna źmianić abličča Ukrainy ci ŭrad razam ź Viktaram Janukovičam zdolejuć ačucca? Ci jość Jeŭramajdan ukrainskaj viersijaj «arabskaj viasny» ci jaho vyniki buduć małaznačnymi?
My zacikaŭlena sačyli za razhortvańniem pratestavaha ruchu ŭ Kijevie ciaham apošnich troch tydniaŭ, adnak vynik zastajecca niapeŭny. Choć pratestoŭcy i pakazali zdolnaść rehularna źbirać bolš za 200 tysiačaŭ čałaviek na akcyi i rašuča zaniali centr Kijeva, prezident i ŭrad zastalisia na svaich miescach. Akramia zbolšaha simvaličnaha znosu nievialikaha pomnika Leninu na bulvary Tarasa Šaŭčenki, pa sutnaści, bolš ničoha nie źmianiłasia.
U cełym, Zachad naziraŭ za padziejami ŭ Kijevie z dabradušnaj adstaronienaściu, a jeŭrapiejskija lidary prahavorvali matyvujučyja banalnaści i zadavalnieńnie, što stolki ludziej padtrymlivajuć nabližeńnie da Jeŭropy i addaleńnie ad Rasii.
Kadry tytaničnaha supraćstajańnia «Bierkuta» i pratestoŭcaŭ, jaki sprabavaŭ začyścić Majdan Niezaležnaści ranicaj 11 śniežnia, pakinuli abyjakavymi niamnohich. Taja padzieja prademanstravała addanaść udzielnikaŭ hramadskaha paŭstańnia.
Ale jak možna acanić situacyju z vyšyni prezidenckaha kresła (što, darečy, zrabić zusim nie lohka)?
Uradavyja budynki i rezidencyja prezidenta ŭ biaśpiecy — nichto nie rabiŭ sprobaŭ šturmavać ich.
Novaja sproba razahnać Majdan małaimaviernaja, a žyćcio tym časam idzie svajoju chadoju. Janukovič sabraŭsia na sustreču z Pucinym u Maskvie i, vidać, vierniecca adtul z padpisanym pahadnieńniem ab vialikaj pazycy i zajavić ab dasiahnieńni Ukrainaj finansavaj biaśpieki [aryhinał artykuła na anhlijskaj movie źjaviŭsia da vizita Janukoviča ŭ Maskvu — zaŭv. pier.].
Z premjer-ministram Mikałajem Azaravym dahetul ničoha nie stałasia.
Na suciašalnym kruhłym stale dziejsnaha i byłych prezidentaŭ vykazvałasia prapanova achviaravać Azaravym u pieršuju čarhu. Janukovič prapanovu praihnaravaŭ: Azaraŭ i jaho daniecki kabiniet ministraŭ usio jašče pry ŭładzie.
Zachodnija palityki nie vykazali biezumoŭnaj padtrymki revalucyi, a Džon Makiejn nie jość aficyjnym pradstaŭnikom Baraka Abamy.
Faktyčna, Makiejn — «puška sa źbitym prycełam». Jon viadomy svaimi razhromnymi atakami na aŭtarytarnyja krainy, ale nie dziejańniami pa ich źniščeńni.
Inšaja sprava — lidar nacyjanalistaŭ z ZŠA Askold Łazynski, jaki taksama vystupaŭ pierad pratestoŭcami.
Dla Janukoviča niama lepšaha padarunka za padtrymku Jeŭramajdanu pravymi demahohami.
Jeŭrapiejskija lidary, u svaju čarhu, kazali ab pierahladzie ŭmoŭ Pahadnieńnia ab asacyjacyi, ale nichto publična nie zajaviŭ, što dalejšy dyjałoh budzie vieścisia tolki z apazicyjaj. Tamu, tearetyčna, zajaviŭšy ab ćviordym namiery padpisać Pahadnieńnie, u budučym heta moža zrabić i ŭrad Azarava.
Hetym razam padtrymka jeŭrapalitykaŭ macniejšaja za 2004-2005 hady, kali Juščanka publična paćvierdziŭ svaju addanaść ES. Ale zachavać pratestavyja nastroi va Ukrainie mahli b tolki dalekasiažnyja harantyi členstva krainy ŭ ES, niahledziačy na sučasny stan ekanomiki i demakratyi. Dy i ŭ Kramli naŭrad ci niechta budzie nie spać načami praź niejkija tam muzyčnyja kancerty ŭ centry Kijeva.
Apazicyja viadzie Jeŭramajdan ci płyvie za im? Ciažka skazać.
Lidary apazicyi časta naviedvajuć Majdan, heta dakładna. Jany vystupajuć sa śmiełymi pramovami, ale zaklikajuć da aściarožnaści, da mirnaha pratestavańnia, što i čakajecca ad demakratyčnych palitykaŭ. Što jašče jany mohuć zrabić?
Małaimavierna dabicca źmienaŭ praz Radu — u apazicyi brakuje hałasoŭ.
Sumnieŭna, kab industryjalnaja Uschodniaja Ukraina padtrymała zaklik da ahulnanacyjanalnaha strajku — tam mocna bajacca nastupstvaŭ Pahadnieńnia ab svabodnym handliz ES.
Najlepšy scenar, na jaki moža raźličvać apazicyja, heta daterminovyja parłamienckija i prezidentskija vybary.
U hetym vypadku apazicyja moža vysunuć patrabavańnie raspuścić uvieś prezidencki ofis. Ale čym jana padmacuje patrabavańnie? Jaki cisk moža akazać apazicyja na parłamient, kab prymusić jaho syści? Kruhłyja stały praciahvajucca, ciapier užo i z udziełam apazicyi, ale jany pryviali tolki da nievialikich sastupak, jak zvalnieńnie kijeŭskich čynoŭnikaŭ, jakija dali dabro na razhon mitynhu 1 śniežnia.
Paŭstaje i jašče adno pytańnie: chto nasamreč kantraluje Ukrainu?
Ni ŭ adnoj krainie Jeŭropy niama takoha zasilla aliharchaŭ, asobaŭ, jakija zakumulavali vielizarnaje bahaćcie, adnak nie majuć palityčnych ambicyj akramia jak być pakinutymi ŭ spakoi ŭ svaich darahich piasočnicach.
Bolšaść aliharchaŭ chacieli b, kab dźviery ŭ ES byli šyroka adkrytyja. Jak, darečy, i dźviery ŭ Rasiju.
Asabliva takija ludzi, jak Dmytro Firtaš, prezident Fiederacyi pracadaŭcaŭ Ukrainy, jaki vykarystoŭvaŭ «hazavuju vajnu» va ŭłasnych metach. Dziŭna, ale ŭkraincy viała pratestavali suprać prajavaŭ niaroŭnaści ŭ hramadstvie u toj čas, kali Partyja rehionaŭ jość demanstracyjaj ułady zamožnych, u vypadku Ukrainy — danieckich i kijeŭskich biznesoŭcaŭ.
I nadziva, Janukovič moh zaŭvažyć, što niahledziačy na pryčutnaść vialikaha partreta Cimašenki na majdanaŭskaj jalincy, chor hałasoŭ nie zajaŭlaje, što pieršym krokam musić stać jaje vyzvaleńnie.
Adnoj z pryčyn moža być zacikaŭlenaść inšych lidaraŭ va ŭłasnaručnym kiravańni pratestami, a prysutnaść Cimašenki na Majdanie mahła b značnia padkasić ich pazicyi. Adnak mienavita doŭhaje źniavoleńnie Cimašenki źniščyła pierśpiektyvy Ukrainy na vilenskim samicie
Choład i niedachop rečaŭ i ježy na Majdanie — najlepšyja sajuźniki Janukoviča, u dadatak da rasijskaj pazyki.
Rana ci pozna, natoŭp budzie razychodzicca, i «Bierkut» zmoža avałodać Majdanam Niezaležnaści, pieravažna biez hvałtu. Ci chacia b taho, što moža trapić na videa ci fota.
Janukovič zachoŭvaje padtrymku dobraj traciny nasielnictva. Aliharchi nie vyraklisia jaho, choć, mabyć, i žadali b bačyć prezidentam bolš naporystaha i ŭpeŭnienaha ŭ sabie lidara.
Tamu pakul stan Janukoviča-prezidenta davoli chistki, jon nie moža nie radavacca ciapierašniemu raźvićciu padziej.
Jeŭramajdan vielmi nahadvaje padziei lipienia 1917 hoda ŭ Pietrahradzie: masavaje paŭstańnie bieź lidaraŭ i biez bačnaha finału.
