Pietycyja supracoŭnikaŭ chutkaj dapamohi horada Minska, jakija patrabavali palapšeńnia ŭmoŭ pracy i pavyšeńnia zarobku, vydalenaja z partała change.org.
Pietycyju, jakuju niekalki dzion tamu stvaryŭ karystalnik Alaksiej Ipataŭ, paśpieła sabrać bolš za 5 100 podpisaŭ. Adnak udzień 7 studzienia Ipataŭ paviedamiŭ, što zbor podpisaŭ pad anłajn-pietycyjaj vymušana spynieny. Ciapier ža staronka, na jakoj raniej mieściłasia pietycyja, uvohule adsutničaje.
Stvaralniki pietycyi nijak nie patłumačyli, z čym było źviazana zamarožvańnie i vydaleńnie pietycyi. Ranicaj 8 studzienia žurnalist «Našaj Nivy» źviazaŭsia ź Vitalom Ahiejenkam, fielčaram 4-j padstancyi chutkaj miedycynskaj dapamohi Minska, jaki źjaŭlajecca adnym z arhanizataraŭ zboru podpisaŭ pad zvarotam da ŭrada. Ahiejenka paabiacaŭ vystupić z aficyjnym tłumačeńniem pryčyn prypynieńnia pietycyi, adnak dahetul nie vyjšaŭ na suviaź.
U anłajn-pietycyi supracoŭniki «chutkaj» patrabavali toje ž, što i ŭ svaim piśmovym zvarocie: pryniaćcia zakona «Ab chutkaj miedycynskaj dapamozie», uklučeńnia ŭ zakanadaŭstva pałažeńniaŭ ab zabieśpiačeńni biaśpieki miedykaŭ; ab strachavańni ad niaščasnych vypadkaŭ na pracy na sumy, jakija dazvalajuć pravieści paŭnavartasnaje lačeńnie, reabilitacyju, jakija pakryjuć škodu svajakam u vypadku śmierci rabotnika chutkaj mieddapamohi; ab sacyjalnych harantyjach (žyllo, lhotnaje piensijnaje zabieśpiačeńnie, režym pracy i adpačynku); ab zabaronie pracy pa adnym miedycynskamu rabotniku ŭ bryhadzie; ab vyznačeńni pakazańniaŭ dla vykliku chutkaj dapamohi; ab stvareńni ŭ rehijonach navučalnych baz dla ŭdaskanaleńnia praktyčnych navykaŭ; pra ŭzmacnieńnie jurydyčnaj adkaznaści pry napadzie na rabotnikaŭ chutkaj dapamohi «pry vykanańni».
Pavodle apošnich dadzienych, piśmovy zvarot padpisała kala 260 čałaviek. Ahiejenka paviedamiŭ «Našaj Nivie», što kampanijaj za palapšeńnie ŭmoŭ pracy chutkaj dapamohi aktyŭna cikaviacca ludzi ŭ rehijonach.
