Brescki mižrajonny adździeł Śledčaha kamiteta zaviaršyŭ pravierku pa fakcie pierapiski ŭ internecie paŭnaletniaha žychara Bresta ź niepaŭnaletnim bieraściejcam na pradmiet najaŭnaści ŭ ich znosinach składu złačynstva, źviazanaha z zamacham na pałavuju niedatykalnaść niepaŭnaletniaha.
Pra heta paviedamiŭ aficyjny pradstaŭnik upraŭleńnia Śledčaha kamiteta pa Bresckaj vobłaści Rusłan Makaruk.
Pa kanfiskavanych śledčym u mužčyny fłeš-kartach, płanšecie, dvuch mabilnych telefonach, noŭtbuku było praviedziena šeść kampjutarna-techničnych i stolki ž mastactvaznaŭčych ekśpiertyz, apytanyja bolš za 20 hramadzian. Byŭ praviedzieny ahlad miesca zdareńnia, žytła, miesca pracy paŭnaletniaha bieraściejca, ahledžany kanfiskavanyja pradmiety.
Ciaham pravierki ŭstanoŭlena, što pierapiska i dalejšyja znosiny ŭdzielnikaŭ hetaha incydentu nie ŭtrymlivajuć prykmietaŭ raspusnych dziejańniaŭ, nakiravanych na ŭźniknieńnie ŭ padletka pałavoj ciahi (takich jak ździajśnieńnie dziejańniaŭ seksualnaha charaktaru ŭ prysutnaści paciarpiełych, demanstracyja im aŭdyjo- i vizualnaj pradukcyi parnahrafičnaha charaktaru abo pradastaŭleńnie anałahičnaj litaratury, apaviadańni seksualnaha charaktaru).
Pa vynikach pravierki śledstvam pryniata rašeńnie ab admovie ŭ zaviadzieńni kryminalnaj spravy ŭ dačynieńni da paŭnaletniaha bieraściejca ŭ suviazi z adsutnaściu ŭ jaho dziejańniach składu złačynstvaŭ, praduhledžanych art.167 (hvałtoŭnyja dziejańni seksualnaha charaktaru), st.168 (dziejańni seksualnaha charaktaru z asobaj, jakaja nie dasiahnuła 16 hadoŭ) i st.169 (raspusnyja dziejańni) KK.
U pačatku listapada 2013 h Brescki mižrajonny adździeł Śledčaha kamiteta pačaŭ pravierku internet-pierapiski žychara Bresta ź niepaŭnaletnim paśla taho, jak mužčynu na adnoj z kvater zatrymali palaŭničyja na piedafiłaŭ. Aktyvisty hramadskaj inicyjatyvy śćviardžali, što 57-hadovy redaktar adnoj z haziet pryjšoŭ tudy dla intymnaj suviazi z padletkam.
