U matčy pieršaha kruha 2-j hrupy Jeŭra-Afrykanskaj zony Kubka Devisa biełaruskija tenisisty pieramahli kamandu Irłandyi ź likam 4:1. Sustreča prajšła na zakrytym korcie Respublikanskaha centra alimpijskaj padrychtoŭki pa tenisie ŭ Minsku.
31 studzienia Dźmitryj Žyrmont (314-je miesca ŭ adzinočnym rejtynhu ATP) vyjhraŭ u Denieła Hłensi (723) — 6:2, 6:4, 6:2, a Jahor Hierasimaŭ (252) uziaŭ vierch nad Džonam Morysi (biez rejtynhu) — 6:4, 6:1, 6:2.
1 lutaha Maksim Mirny (26-je miesca ŭ parnym rejtynhu) i Alaksandr Bury (212) pieramahli Džejmsa Kłaski (152) i Devida O`Chara (biez rejtynhu) — 6:7 (3:7), 7:6 (8:6), 5:7, 7:6 (10:8), 6:2.
2 lutaha ŭ pieršym matčy dnia Hierasimaŭ byŭ macniejšy za Hłensi — 6:3, 6:3. U druhim na kort zamiest Žyrmonta vyjšaŭ nie zajaŭleny za haspadaroŭ Ilja Ivaška (770), tamu biełaruskaj zbornaj było zaličana techničnaje paražeńnie, a pajadynak Ivaški z Morysi nasiŭ vystavačny charaktar i ŭ zalik Kubka Devisa nie ŭvajšoŭ. Biełaruski spartsmien byŭ macniejšy — 6:4, 7:6 (8:6).
«My śviadoma addali irłandcam ačko, ale nabyli značna bolš: mahčymaść abkatać maładoha hulca», — adznačyŭ kapitan zbornaj Biełarusi Uładzimir Vaŭčkoŭ na pres-kanfierencyi paśla zakančeńnia matču. Pavodle jaho słoŭ, u adroźnieńnie ad situacyi dziesiacihadovaj daŭnaści ŭ zbornaj jość łaŭka zapasnych — «hulcy, hatovyja pakazvać tenis, jaki adpaviadaje hrupie Kubka Devisa, u jakoj my vystupajem». Mienavita tamu, padkreśliŭ Vaŭčkoŭ, jamu ciažka skazać, ci vystupiać u druhim kruzie ŭ krasaviku tenisisty, jakija vychodzili na kort ciapier.
Jak adznačyŭ kapitan haściej Hery Kechił, samaj cikavaj była parnaja sustreča, a ŭ asobnych kłas sapiernikaŭ zanadta adroźnivaŭsia. «Jašče było vielmi «chutkaje» pakryćcio, u Irłandyi takoha niama. Ale heta nie moža słužyć nam apraŭdańniem», — zajaviŭ kapitan.
U matčy za vychad u płej-of 2-j hrupy Jeŭra-Afrykanskaj zony Kubka Devisa biełaruskija tenisisty sustrenucca ŭ haściach z kamandaj Małdovy. 2 lutaha ŭ pieršym raŭndzie małdavanie daterminova vyjhrali ŭ Kišyniovie ŭ Jehipta - 3:1.
Sustreča Małdova—Biełaruś projdzie 4—6 krasavika. Pieramožca pary zhulaje ź lepšym u supraćstajańni Danija—Luksiemburh.
U rejtynhu Kubka Devisa Biełaruś zajmaje 53-je miesca, Małdova — 49-je.
