Na što treba kinuć usie siły, – heta na ŭtrymańnie viery. Piša Siarhiej Budkin.
Šmat znajomych čakała prezydenckija vybary. Chaj u razmovach vialikaha aptymizmu nie vykazvałasia, ale žartački kštałtu «Kali ŭsio źmienicca, nabudu novuju mabiłu» adpuskalisia časta. Prahnaść źmienaŭ była kudy bolšaja, čym racyjanalnaść razvahaŭ. Unutry niešta tachkała, i navat rozum zaklikaŭ zrabić staŭki: usio albo ničoha. Ale prajšli samyja haračyja dni viasny-2006. Źnikli ŭśmieški z tvaraŭ samych viasiołych dziaŭčat, nichto ŭžo nia kpić z aficyjoznych lozunhaŭ. Šmat kaho z maładych apanavała depresija, niechta sa ślaźmi na vačoch šukaje svaich znajomych. Kožny kožnamu telefanuje štochviliny: «A vy choć acaleli tam?» Kali adkaz stanoŭčy, druhoje pytańnie – «Jak žyć dalej?»
Ź vieraju
Možna, kaniečnie, šukać adukacyjnyja prahramy, kab uładkavacca za miažoj (naprykład, http://edu.euro26.by). Možna praciahvać suisnavać u adnoj studenckaj aŭdytoryi z beeresemaŭcam ci narakać na byłuju adnakurśnicu, jakaja zrabiła haniebny repartaž na BT. Vybar kožnaha. Adzinaje, na što treba kinuć usie siły, – heta na ŭtrymańnie viery. Toj viery, jakaja kipieła-viravała zusim niadaŭna i zmušała iści na hieraičnyja ŭčynki kštałtu taho, kali studenty-pieršakurśniki ŭładkavali nalepku «Marš svabody» na dźviery dekanu.
Niejak Siarhiej Dubaviec apaviadaŭ, što ŭ časy maładości jon viedaŭ pajmienna ŭsich biełaruskamoŭnych u stalicy. Ciapier sytuacyja inšaja. Absalutnaja realnaść: pałova pasažyraŭ aŭtobusa ŭ hadzinu pik razmaŭlaje pa-biełarusku. A jak hudzie muzyčny Biełnet ad śviežych piesień maładych i viadomych rok-hurtoŭ: «Uzdymajcie zapalnicy!», «Biełaruś budzie volnaj!», «Usio roŭna my pieramožam!» (patryjatyčnyja i liryčnyja pieśni znajści možna tut – www.music.fromby.net). Nie hublajcie pačućcia humaru – varta praciahvać pić ź siabrukami na śviatach za «stabilnuju, samabytnuju, alimpijskuju…» Biełaruś pad fanerny kancert z ANT, pierakazvać anekdoty dy malavać «žaby» kštałtu ašalełych amapaŭcaŭ z kryłami aniołaŭ. I – nia bojciesia: «Kali vy skaryciesia strachu – vy prajhrali. Kali nie – prajhrali jany, z usimi svaimi dubinkami, vintoŭkami i hranatami, turmami dy aŭtazakami», – pišuć stvaralniki novaha internet-resursu za-svabodu.org.
Z prahaju
Daviałosia na dniach pačuć takoje: «Pastajali my noč na Kastryčnickaj. A sensu?» Skieptykam varta pačytać virtualnyja dziońniki siońniašnich zmaharoŭ (samy papularny – http://bullochka.livejournal.com), pasłuchać apoviedy tych, chto adbyŭ termin pakarańnia. Vysnova naprosicca sama saboj – hetaja častka ludziej pieramahła. Najpierš svoj strach. Hetaja častka ludziej zahartavałasia dy skansalidavałasia mižsobku. I parušyć hety žyvy łancuh anijakija dručki nia ŭ stanie. Praha moža vyjaŭlacca ŭ čym zaŭhodna. Ułasna žadańnie razmaŭlać pa-biełarusku – užo prykmieta nieskaronaści. Davioŭšy choć by kielnercy-ciemrašałcy, što heta takoje – «harbata z cytrynaj biaz cukru», – možna śviatkavać mini-pieramohu.
Z učynkami
Jašče adna pieravaha ŭ paraŭnańni z časami maładości Dubaŭca – vialikija techničnyja mažlivaści. Prynter dazvalaje razdrukoŭvać niezaležnyja hazety, jakija ciažka ciapier dastać. Fota- i telekamera – pakazać znajomcam-łukašystam, što nia ŭsio tak adbyvałasia, jak demanstrujuć pa biełTV. Pra mažlivaści Internetu – lišnie kazać: šarahovy performans/fłeš-mob, na padrychtoŭku jakoha raniej išli tydni, zaraz arhanizujecca za niekalki chvilinaŭ – dastatkova raspaŭsiudzić praz ISQ, elektronnuju poštu, žyvy žurnał, forumy – i hatova. Mienavita takim šlacham ludzi sabralisia na fłeš-mob z čytańniem «Saŭbielii» i praviali akcyju Salidarnaści z palitviaźniami na hetym tydni.
Vartaja sprava, navat pry maksymumie pieraškodaŭ, znojdzie svajo ŭvasableńnie. Zadušany, padavałasia b, časopis «Studenckaja dumka» niadaŭna vyjšaŭ u novym farmacie – na kampakt-dysku. Novy muzyčny łejbł «Volia Music», jaki, zdavałasia na pieršy pohlad, nia mieŭ anijakich šancaŭ na raskrutku takoha radykalnaha prajektu, jak «Pieśni Svabody», zładziŭ raspaŭsiud dyskaŭ nia praz handlovyja kropki, a pa pryvatnaj padpiscy. Nia kažučy ŭžo pra toje, što na zabaronieny dla dostupu ŭ biełaruskich internet-kaviarniach sajt muzyčna-pravakacyjnaha «Ŭltravožyka» možna zajści praź dziasiatki inšych adresaŭ. Na dniach u Biełnecie źjaviŭsia prajekt BZZ! (www.studenty.by/bzz.html). «BZZ! papraŭlaje zdaroŭje ŭsim achvotnym. Prykalisia z tupizny – tut joj i kapiec!», – tłumačać zmahary ź niezdarovymi bZZikami svaich suajčyńnikaŭ i zaklikajuć dałučacca ŭsich, dla kaho słovy «Skaryna» i «Picier», naprykład, jość temaj dla natchnieńnia.
A čaho Vam kaštuje zapisać sapraŭdny rok-hit, pry najaŭnaści na toje zdolnaściaŭ? Jakasny zapis siońnia zrabić kudy lahčej i tańniej, čym navat 10 hod tamu. Dastatkova tolki mieć kamputar z peŭnymi prahramami. Dy instrumenty, naturalna. A vieršy pisać dyk naohuł vydatkaŭ nie vymahaje. I ŭ samaj bližejšaj budučyni akamianieły, staramodny režym skanaje sam.
