Hałoŭnakamandujučy VPS Rasiei zajaviŭ, što da kanca hoda ŭ Baranavičach budzie raźmieščany źniščalny avijacyjny połk u kolkaści 24 źniščalniki SU-27SM3.
17 sakavika hałoŭnakamandujučy VPS Rasiei hienierał-lejtenant Viktar Bondaraŭ paviedamiŭ ITAR-TASS ab pavieličeńni vajennaj prysutnaści rasijskaj avijacyi ŭ našaj krainie. Baranavicki aeradrom jon nazvaŭ «rasijskaj avijabazaj».
«U Biełarusi ŭ nas na pastajannaj asnovie zaraz znachodzicca źviano źniščalnikaŭ SU-27SM3 u kolkaści čatyroch mašyn, jakoje vykonvaje zadačy SPA Sajuznaj dziaržavy Rasii i Biełarusi. Pa płanie hetaha hoda tudy sadžajuć jašče eskadrylli, a da kanca hoda na aeradromie «Baranavičy», dzie znachodzicca naša avijabaza, budzie razhornuty połk SU-27SM3 u składzie dvuch eskadryllaŭ - usiaho 24 mašyny, - zajaviŭ rasijski vajskoviec. - Jany buduć nieści bajavoje dziažurstva, zabiaśpiečvajučy SPA i niedatykalnaść pavietranaj prastory Sajuznaj dziaržavy».
Biełaruskaje kiraŭnictva nie rabiła pakul nijakich zajaŭ ab dadatkovym pałku rasijskaj avijacyi ŭ našaj krainie.
12 sakavika prezident Alaksandr Łukašenka prapanavaŭ Rasiei raźmiaścić u krainie dadatkova da 15 bajavych samalotaŭ. Pavodle słoŭ Łukašenki, z-za pačatku vučeńniaŭ vojskaŭ NATA la biełaruskaj miažy jon parekamiendavaŭ rasijskamu kiraŭnictvu pavialičyć vajennuju prysutnaść u našaj krainie.
Užo 13 sakavika ŭ Babrujsk prybyło 6 rasijskich SU-27 i try vajenna-transpartnyja samaloty. Sa śniežnia 2013 hoda ŭ Baranavičach bajavoje dziažurstva niasie źviano rasijskich źniščalnikaŭ. 15 sakavika pres-słužba Ministerstva abarony paviedamiła ab pierakidcy rasijskaha samalota dalokaha radyjołakacyjnaha vyjaŭleńnia A-50 na biełaruski aeradrom «Baranavičy» dla ŭdziełu ŭ druhim etapie pravierki hatoŭnaści adzinaj rehijanalnaj sistemy SPA Biełarusi i Rasii.