Na miescy «Respubliki KaZantip» novyja ŭłady Kryma źbirajucca pabudavać pravasłaŭny manastyr i ŭ budučyni ładzić fest pravasłaŭnaha mastactva. Pavodle novaha kiraŭnika Kryma Siarhieja Aksionava, inicyjatyva adbić plaž u rejvieraŭ zychodzić niepasredna ad patryjarcha RPC Kiryła. Maŭlaŭ, uładyka «padkreśliŭ, što padobnym «Kazancipu» festam nie miesca na pravasłaŭnaj ziamli».
Na dumku Aksionava, kurataram festu pravasłaŭnaha mastactva całkam moža stać arhanizatar «Kazancipa» Mikita Maršunok. «Jon maje vialiki dośvied u stvareńni masavaha mierapryjemstva i jaho praviadzieńni… Ja havaryŭ z patryjarcham Kiryłam, jon navat hatovy nadzialić Mikitu duchoŭnym sanam ŭ abmien na dapamohu», — raspavioŭ Aksionaŭ ukrainskim ŚMI.
Raniej pra namier zaniacca festam, jakija ciapier traplaje pad rasijskuju jurysdykcyju, zajaviła Fiederalnaja słužba RF pa kantroli za abarotam narkotykaŭ. Jana paabiacała pravieści rejdy na «Kazancipie» padobna tym, jakija ładziacca pa kłubach, «kali jość infarmacyja pra toje, što tam maje miesca abarot narkotykaŭ». Maršunok, jon ža prezident «Respubliki KaZantip», u svaju čarhu, paabiacaŭ 10 tysiač dołaraŭ tamu, chto złović na jaho feście narkadylera.
Adzin z najbujniejšych festaŭ elektronnaj muzyki Uschodniaj Jeŭropy, «Kazancip», prachodzić u Krymie z 1992 hoda. Praz hady vandrovak miescam dysłakacyi šmatdzionnaha rejva stała siało Papoŭka pad Jeŭpatoryjaj.
Sioletni «Kazancip» maje adbycca ŭ pieršaj pałovie žniŭnia.
