U Biełarusi ŭ sielskahaspadaračy abarot viernuty 6,5% ziamiel, jakija raniej byli vyviedzieny z vykarystańnia z-za zabrudžańnia paśla avaryi na Čarnobylskaj AES u 1986 hodzie.
Pra heta na pres-kanfierencyi 24 krasavika ŭ Minsku paviedamiŭ namieśnik načalnika departamienta pa likvidacyi nastupstvaŭ katastrofy na ČAES Ministerstva pa nadzvyčajnych situacyjach Mikałaj Cybulka.
Jon raskazaŭ, što paśla avaryi na ČAES z haspadarčaha abarotu ŭ Biełarusi było vyviedziena 265 tys. ha ziamiel sielskahaspadarčaha značeńnia. «Za postčarnobylski pieryjad, asabliva ŭ apošnija hady, my ŭviali ŭ abarot 17,2 tys. ha ziamiel. Heta tyja ziemli, jakija pa ŭzroŭni radyjeaktyŭnaha zabrudžańnia prydatnyja dla vykarystańnia ŭ sielskaj haspadarcy, dzie mahčyma stabilna atrymlivać narmatyŭna čystuju pradukcyju raślinavodstva, žyviołahadoŭli i vyrablać karmy», — skazaŭ pradstaŭnik MNS.
Praz 28 hadoŭ paśla katastrofy, zaznačyŭ čynoŭnik, u sielskahaspadarčym abarocie znachodziacca pryblizna 990 tys. ha ziamiel, zabrudžanych cezijem, 339 tys. ha — stroncyjem-90. Na hetych ziemlach pravodzicca kompleks mierapryjemstvaŭ dla taho, kab vyrablać tam «narmatyŭna čystuju pradukcyju», radyjacyjny fon jakoj znachodzicca ŭ miežach, ustanoŭlenych zakonam. «Heta vapnavańnie kisłych hlebaŭ, prymianieńnie pavyšanych doz fosfarnych i kalijnych uhnajeńniaŭ, mielijaracyjnaja praca dla aptymizacyi vodnaha režymu», — rastłumačyŭ Cybulka.
«Zabrudžanyja płoščy značna źmienšylisia, bo ŭ pačatku było zabrudžana prykładna 1,8 młn. ha», — dadaŭ jon.
Kab atrymać adnosna čystyja lesamateryjały, departamient pa likvidacyi nastupstvaŭ katastrofy na ČAES taksama prymianiaje zaścierahalnyja miery ŭ lasnoj haspadarcy.
«Za 2012—2013 hady my zrabili vialikuju pracu na terytoryi adčužeńnia. Heta tyčycca Paleskaha radyjacyjna-ekałahičnaha zapaviednika, — skazaŭ pradstaŭnik MNS. — Jamu prysvojeny surjozny status navukova-daśledčaj pryrodaachoŭnaj ustanovy. Kiraŭnik dziaržavy padpisaŭ ukaz pa našym zapaviedniku. Zaraz tut vydzieleny dźvie bujnyja zony — niepasredna zapaviednaja zona, jakaja zajmaje pryblizna 60%, i na pieryfieryi zapaviednika — ekśpierymientalna-haspadarčaja zona, dzie viaducca navukovyja raboty, z tym kab adpracavać technałohii mahčymaha ŭciahvańnia častki ziamiel u haspadarčaje karystańnie».
U miežach profilnaj dziaržaŭnaj prahramy na zabrudžanych terytoryjach siońnia realizujucca prykładna 60 prajektaŭ, skiravanych na sacyjalna-ekanamičnaje raźvićcio — ekanamičnaje adradžeńnie paciarpiełych ad avaryi rehijonaŭ, stvareńnie novych pracoŭnych miescaŭ.
U cełym radyjacyjnaje stanovišča siońnia «značna stabilizavałasia». U suviazi z hetym, zajaviŭ Cybulka, u niekatorych adsielenych terytoryjach, «dzie ščylnaść zabrudžańnia nizkaja», zdymajecca kantrolna-prapuskny režym.
