Apazicyja niepryznanaj śvietam Abchazii ŭ pieršuju čarhu patrabuje adstaŭki prezidenta. Hałoŭnaje patrabavańnie abchazskaj apazicyi - adstaŭka prezidenta Alaksandra Ankvaba, zajaviŭ RIA Novosti lidar apazicyjanieraŭ, były vice -prezident respubliki Raul Chadžymba.
«Adstaŭka prezidenta — u pieršuju čarhu. A ŭsio astatniaje — źviony ŭ łancuhu», — adznačyŭ jon.
Pry hetym Chadžymba, abrany napiaredadni kiraŭnikom apazicyjnaha «časovaha savieta narodnaha davieru», padkreśliŭ, što dyjałoh ź ciapierašnimi ŭładami praciahvajecca.
Pa słovach Chadžymby, abstanoŭka ŭ respublicy ciapier narmalnaja. «Situacyja spakojnaja, nijakich ekscesaŭ», - skazaŭ jon.
Apazicyja patrabuje adstaŭki prezidenta i reformy sistemy ŭłady.
Hetym padziejam papiaredničaŭ šmattysiačny mitynh u Suchumi 27 maja kala kompleksu uradavych budynkaŭ. Prezident respubliki Alaksandr Ankvab acharaktaryzavaŭ situacyju jak sprobu zachopu ŭłady uzbrojenym šlacham. Premjer-ministr krainy zajaviŭ, što źmiena prezidenta Abchazii moža adbycca tolki ŭ vyniku vybaraŭ. U čaćvier parłamient Abchazii pryniaŭ pastanovu ab abviaščeńni votumu niedavieru premjeru i prapanavaŭ prezidentu krainy dobraachvotna skłaści paŭnamoctvy.
Raul Chadžymba, jak paviedamlaje bijahrafičny artykuł u Vikipiedyi, vučyŭsia ŭ 1985—1986 hh. u Minskaj škole KDB dla ludziej z vyšejšaj adukacyjaj,
potym z 1986 pa 1992 hh. pracavaŭ u Tkuarčalskim haradździele KHB Abchazii. Padčas hruzina-abchazskaha kanflikta 1992—1993 hh. byŭ načalnikam słužby vajennaj raźviedki i kontrraźviedki «Uschodniaha frontu», u 1996—1999 h. u Mytnym kamitecie Abchazii, u 1999—2001 hh. — Staršynia Słužby dziaržbiaśpieki Abchazii, z 2003 h. — premjer-ministr, u 2004—2009 hh. — vice-prezident Abchazii.
