U Internecie źjaviŭsia videazvarot kamandujučaha horłaŭskimi terarystami Ihara Bieźlera, u jakim jon papiaredžvaje ŭkrainskija ŭłady ab tym, što kali jany nie vyzvalać jaho čałavieka, jon rasstralaje usich aficeraŭ, jakija znachodziacca ŭ jaho pałonie.
Bieźler zajaŭlaje, što ŭkrainskija ŭłady zatrymali jaho čałavieka, jakoha jon moh abmianiać na aficeraŭ ukrainskaj armii, SBU i milicyi.
«Try dni «ŭkrainskaja chunta» admaŭlajecca mianiać aficeraŭ na taho čałavieka, jakoha jany zachapili. U mianie ŭ pałonie znachodziacca try pałkoŭniki SBU, try padpałkoŭniki. Na dadzieny momant usie damoŭlenaści z ukrainskim bokam parušany. Ja čakaŭ troje sutak, ale zaraz u mianie niama času bolš čakać. Ciapier buduć rasstralanyja spadar Budzik i spadar Vasiuščenka. Dla spadara Turčynava, Parubija i ŭsich, chto ź imi: kali praz hadzinu moj čałaviek nie budzie vyzvaleny, budzie rasstralanaja druhaja dvojka. Jašče praz 1,5 hadziny — treciaja dvojka. i tak, pakul nie buduć rasstralanyja vosiem aficeraŭ. Kali ŭkrainskaj armii i dziaržavie hetyja aficery nie patrebnyja, to mnie jany nie patrebnyja i pahatoŭ», — skazana ŭ zvarocie.
U kancy videa pa jaho zahadzie čałaviek u mascy stralaje pa dvuch ludziach, jakija stajali kala ściany.
Na dadzieny momant nieviadoma, ci źjaŭlajecca heta videa pastanovačnym.
Raniej ŭ Horłaŭcy ludźmi Bieźlera było insceniravana «publičnaje pakarańnie» načalnika kryminalnaj milicyi Kalininskaha rajona Ramana Babiuka i načalnika kryminalnaha vyšuku hetaha ž rajona Dźmitryja Krykunova. Paźniej vyśvietliłasia, što «rasstreł» vioŭsia chałastym patronami, a milicyjanty žyvyja.
