Zakładniki, jakich trymali ŭ budynku milicyi Słavianska, unačy zaŭvažyli, što achova źnikła. Ale ludzi bajalisia vychodzić u ciemry, čakajučy pravakacyj.
Tolki kali raźvidnieła, kala 03:40, ludzi samastojna vyjšli z budynku. U kabinietach HUUS usio było kinuta: rečy, zbroja, navat hrošy, adznačajuć śviedki.
Uranku ŭ Słaviansk uvajšli vyviedčyja i pieradavyja čaści ŭkrainskaha desantu i Nacyjanalnaj hvardyi.
Žychary horada źbirajuć i zdajuć im zbroju.
Adychodu bajevikoŭ z horada papiaredničali zaciatyja bai. Učora zahinuła prynamsi 18 ukrainskich vajskoŭcaŭ. Jašče kala siamidziesiaci byli paranienyja. Bajeviki pačali adstupleńnie paśla taho, jak ukrainskija vajskoŭcy zaniali nasielenyja punkty Mikałajeŭka i Siamionaŭka, praź jakija terarysty padtrymlivali suviaź z Rasijaj. U Mikałajeŭcy było zachoplena šmat asobaŭ, jakich padazrajuć u naležnaści da niezakonnych uzbrojenych farmiravańniaŭ.
Kałona bajevikoŭ sa Słavianska, niahledziačy na ščylny ahoń z boku ŭkrainskich vajskoŭcaŭ, prarvałasia ŭ Kramatorsk.
Vidavočcy paviedamlajuć, što try KamAZy, dva tanki i 8 mašyn biez far pralacieli pa trasie sa Słavianska i pajechali da centra Kramatorska, dzie znachodzicca hałoŭny štab miascovych bajevikoŭ. Akramia taho, u mikrarajonie Błakitny zaŭvažyli adzin BTR i 5 aŭto terarystaŭ. U Twitter karystalniki paviedamlajuć, što ŭsiaho sa Słavianska ŭ Kramatorsk prarvalisia 50 adzinak techniki terarystaŭ. Sa słovaŭ pres-sakratara Antyterarystyčnaj apieracyi, adzin tank, dva BTRy i dva BMD bajevikoŭ byli padbity ŭ časie praryvu.
Rasijskija infarmacyjnyja ahienctvy paviedamlajuć, što štab bajevikoŭ pieramiaściŭsia ŭ Kramatorsk. Miascovyja danieckija sajty pišuć, što pry hetym bolšaść uzbrojenych ludziej uciakła dalej, u Danieck. U Danieck pieravieźli i paranienych. Hałoŭny doktar vajskovaha špitala ŭ Daniecku zajaviŭ, što ŭvieś piersanał zaniaty raźmiaščeńniem paranienych bajcoŭ.
Słaviansk zastavaŭsia pad kantrolem bajevikoŭ ź siaredziny krasavika. Jon byŭ zachopleny dyviersijnaj hrupaj rasijskaha śpiecnaza, jakaja halvanizavała miascovuju piatuju kałonu. Učora kamandzir bajevikoŭ pałkoŭnik HRU Rasii Strałkoŭ (Hirkin) zajaŭlaŭ, što ŭ vypadku, kali Rasija nie ažyćciavić pramoj interviencyi, jany pratrymajucca nie bolš za tydzień.
Karta bajavych dziejańniaŭ z rasijskaj krynicy: RIA «Novosti».
U vyniku bajoŭ Słaviansk pakinuli dźvie traciny žycharoŭ. «Daŭ daručeńnie načalniku Hienštaba padniać Dziaržaŭny ściah nad Słavianskam», — napisaŭ na svajoj staroncy ŭ Fejsbuku prezident Ukrainy Piatro Parašenka.
Paźniej pryjšło paviedamleńnie, što bajeviki biahuć i z Kramatorska.
«Kałona terarystaŭ, jakija ŭciakli z Słavianska i Kramatorska, ruchajecca ŭ kirunku Daniecka». Pra heta paviedamlaje niezaležny daniecki internet-sajt sa spasyłkaj na vidavočcaŭ z Kramatorska.
Prarasijskija bajeviki adkryvajuć stralbu pa abjektach na darozie.
«Bolšaść terarystaŭ — u cyvilnaj vopratcy i na pryvatnych mašynach. Kałona braniatechniki składajecca bolš jak z dvaccaci adzinak. A inšych mašyn — džypaŭ, KamAZaŭ, «Hazielaŭ» i lehkavych aŭto — bolš čym 200 adzinak», — pišuć z Daniecka.
