21 listapada — suśvietny dzień pryvitańniaŭ. Jon adznačajecca štohod z 1973 hoda. Ideja dnia pryvitańniaŭ źjaviłasia ŭ razhar chałodnaj vajny i naležyć dvum bratam‑amierykancam — Majkłu i Brajanu Makkomakam. Poźniaj vosieńniu 1973‑ha, sustreŭšysia ŭ štacie Niebraska, braty adasłali piśmy va ŭsie kancy śvietu ź vietlivymi pryvitańniami ŭ znak pratestu suprać uzmacnieńnia mižnarodnaj napružanasci. U piśmach była prośba pavitać jašče kaho‑niebudź… U vyniku ideja znajšła padtrymku nie tolki ŭ prostych ludziej, ale i ŭ kiraŭnikoŭ dziaržaŭ. Z taho času 21 listapada — Suśvietny dzień pryvitańniaŭ, radasnych emocyj i dobraha nastroju.
Napiaredadni Suśvietnaha dnia pryvitańniaŭ my spytali, kamu b chacieli pieradać pryvitanni ludzi viadomyja i adkaznyja.
Volha Barabanščykava, śpiavačka i televiadučaja:
— Pakolki zaraz ja znachodžusia ŭ Amierycy, chaču pieradać pryvitańnie ŭsim maim blizkim i znajomym na radzimie. Čakajcie, chutka ja budu doma.
Asol Sliviec, pryzior čempijanataŭ śvietu pa frystajłu:
— Pryvitańnie ja pieradała b Dziedu Marozu, u mianie prosta zaraz navahodni nastroj. Usich astatnich, zdajecca, ja baču kožny dzień… A jašče chacieła b pavitać svaju siabroŭku Natašu, jakaja, darečy, była śviedkaj na maim viasiełli, i jaje muža Słavu. My siabravali z samaha dziacinstva. Ciapier Nataša žyvie ŭ Kanadzie, u horadzie Vankuviery. Kali my bačymsia raz u hod — heta vialikaja ŭdača, razmaŭlajem u asnoŭnym pa telefonie ci pa elektronnaj pošcie. Dzimu Raku pryvitańnie, choć jon i tut žyvie. Jon dobry čałaviek, i ŭsio ŭ jaho budzie dobra. Pryvitańnie dźvium maim babulam i dziadulu. Jany žyvuć u Minsku, ale ŭ roznych kancach horada, bačymsia nie vielmi časta. Ale babuli hłyboka ŭ kursie majoj prafiesii, imknucca razabracca ŭ tonkaściach łyžnaj akrabatyki…
Alena Pieniaź, pres‑sakratar Ministerstva pryrodnych resursaŭ i achovy navakolnaha asiarodździa:
— U mianie dva prafiesijnyja pryvitanni. Pieršaje — dvum biełaruskim udzielnikam 53‑j rasijskaj antarktyčnaj ekśpiedycyi. Heta Alaksiej Hajdašoŭ i Viktar Dziomin. Apošni, darečy, samy małady biełaruski palarnik — jamu ŭsiaho 21 hod. U ich siezonnaja ekśpiedycyja, i dadomu jany viernucca tolki praz paŭhoda.
Druhoje pryvitańnie ŭdzielnikam mižnarodnaha sieminara «Vuhlarodnaje finansavańnie: pierśpiektyvy i rola ŭ nacyjanalnaj palitycy pa praduchileńni źmien klimatu», jaki dva dni prachodzić u haradskoj ratušy. Heta śpiecyjalisty ź Biełarusi, Rasii, Aŭstryi, Šviecyi, ZŠA, Słavienii, Japonii.
Asablivaje pryvitańnie vypusknikam fakulteta žurnalistyki BDU 2001 hoda…
Daniła Dałmataŭ, člen kamiteta spabornictvaŭ pa džyp‑tryjału Biełaruskaj aŭtamabilnaj fiederacyi:
— U suviazi z zakančeńniem aŭtaspartyŭnaha siezona ŭ Biełarusi pieradaju pryvitańnie ŭsim pieramožcam roznych spabornictvaŭ usich katehoryj. A taksama arhanizataram spabornictvaŭ i žurnalistam, jakija nam dapamahali. Pryvitańnie ŭsim amataram aŭtasportu, jakija sačyli za spabornictvami. U nastupnym siezonie pažadaju pryhožych i zapaminalnych momantaŭ i sumlennaj baraćby. Akramia taho, pryvitańnie majoj dziaŭčynie Taćcianie, jana — moj vielmi dobry pamočnik.