U Rečyckim rajonnym sudzie siońnia zaviaršyłasia słuchańnie kryminalnaj spravy pa trahičnaj avaryi, u jakoj paciarpieli piać čałaviek, ź ich troje zahinuli.
Sud pryznaŭ kiroŭcu vinavatym u parušeńni praviłaŭ darožnaha ruchu ŭ stanie ałkaholnaha apjanieńnia, što paciahnuła pa nieaściarožnaści śmierć traich čałaviek, a taksama pryčynieńni ciažkich cialesnych paškodžańniaŭ dvum asobam. Jon taksama pryznany vinavatym u naŭmysnym pakidańni paciarpiełych ŭ niebiaśpiecy.
Sud pieršaj instancyi prysudziŭ jaho da 10 hadoŭ pazbaŭleńnia voli z adbyvańniem pakarańnia ŭ papraŭčaj kałonii ahulnaha režymu.
Zadavolenyja materyjalnyja pazovy paciarpiełych ab kampiensacyi maralnaj škody. Asudžanamu treba budzie vypłacić usiaho bolš za miljard rubloŭ. Prysud nie ŭstupiŭ u zakonnuju siłu i moža być abskardžany bakami pracesu.
DTZ adbyłosia ŭ noč z 19 na 20 sakavika hetaha hoda. «Krajśler-Pacyfik», jakim kiravaŭ 28-hadovy miascovy žychar i jaki ruchaŭsia pa vulicy Savieckaj, vyjechaŭ na prypynak hramadskaha transpartu «Vulica Frunzie», dzie znachodzilisia ludzi.
Mašyna litaralna źmiała paviljon na prypynku. Na miescy trahiedyi zahinuli dvoje miascovych žycharoŭ 27 i 48 hadoŭ. U reanimacyi pamior treci — 26 hadoŭ. Jašče dva čałavieki — chłopcy 19 i 20 hadoŭ — atrymali surjoznyja kalectvy.
U chodzie rasśledavańnia było ŭstanoŭlena, što, pierš čym sieści za rul, kiroŭca ŭžyvaŭ śpirtnyja napoi ŭ kampanii dvuch siabroŭ, jakija ŭ čas DTZ znachodzilisia ŭ mašynie ŭ jakaści pasažyraŭ. U sudzie jany prachodzili śviedkami pa hetaj spravie. Padčas ruchu pa horadzie abvinavačany pieravysiŭ chutkaść i straciŭ kiravańnie, vyjechaŭšy na pałasu sustrečnaha ruchu. Adnak, raspačaŭšy manieŭr, nie zmoh spravicca ź situacyjaj i zajechaŭ u prypynačny punkt.
U svaim apošnim słovie abvinavačany paprasiŭ prabačeńnia ŭ svajakoŭ zahinułych, a taksama ŭ dvuch paciarpiełych— maładych ludziej, jakija ŭ vyniku avaryi atrymali surjoznyja traŭmy. Adnamu ź ich była amputavanaja kiść ruki. Bok dziaržaŭnaha abvinavačvańnia (rajonnaja prakuratura) zaprasiŭ maksimalny termin pakarańnia, praduhledžany dadzienymi artykułami, — 10 hadoŭ pazbaŭleńnia voli. Na tym ža nastojvali i paciarpiełyja.
Hł. taksama:
Chłopcu amputavali ruku paśla strašnaj avaryi ŭ Rečycy — patrebna dapamoha
