Rasija, Kitaj, Vieniesueła — usie hetyja krainy stali «siabrami Biełarusi», bo byli hatovyja niešta dać. Naftu, haz, lhotnyja kredyty… Tym časam
na Blizkim Uschodzie ŭsio ščylniejšyja adnosiny zaviazvajucca z Kataram, choć tavarazvarot pamiž Biełaruśsiu i hetaj krainaj nie vychodzić za miežy statystyčnaj pamyłki (kala $2,5 miljona ŭ lepšyja hady). Heta, adnak, nie pieraškadžaje arabam prajaŭlać pilny intares da Biełarusi. Supracoŭnictva ź imi asabista kuryruje syn kiraŭnika Biełarusi Viktar Łukašenka.
U 2011-m byŭ anansavany prajekt «Katarski vostraŭ». Kala Bresta miełasia paŭstać śpiecyjalnaja zona z arabskimi kulturnymi i dziełavymi centrami. A z abłasnoha aeraporta chacieli arhanizavać pramyja avijapieraloty ŭ Dochu.
U vyniku katarcy spynilisia na budaŭnictvie ŭ Minsku. Na placoŭcy kala futbolnaha manieža jany ŭzvodziać spartkompleks, kinateatr i hatel. Płanavałasia adkryć jaho da chakiejnaha čempijanata śvietu, ale terminy sarvali.
Ahułam u budoŭlu ŭkładuć kala $180 miljonaŭ.
Katar — absalutnaja manarchija, tamu i jaje zamiežnyja aktyvy naležać šejchu. Minski prajekt realizujuć Uzbrojenyja siły Katara, jakija majuć svoj inviestycyjny fond. Simvałam katarskaj armii źjaŭlajecca sokał, tamu i ŭtvoranuju kampaniju nazvali «Sokał».
Druhi pryjarytet dziejnaści katarcaŭ u Biełarusi — kupla ziamli. Pavodle zakanadaŭstva, zamiežniki nie mohuć nabyvać jaje va ŭłasnaść, tamu biaruć u arendu na 99 hadoŭ.
Spačatku stała viadoma pra 25 ha lesu kala Dubraŭskaha vadaschovišča, heta kala 20 km ad Minska ŭ łahojskim nakirunku. Učastak byŭ vydzieleny dla budaŭnictva i ekspłuatacyi rezidencyi ŭ krasaviku 2013 hoda. Vakoł jaho pakul tolki zakapali apory dla čatyrochmietrovaha płota. Padrabiaznaści hetaj historyi «Naša Niva» pisała ŭ №28 ad 30 lipienia 2014 hoda. Adnak heta tolki maleńkaja častka ad katarskich abšaraŭ na Łahojščynie.
Iźbišča, Pahost, Kamiena, Vyhar, Laśniki… — ahułam ź dziasiatak viosak adčuli źjaŭleńnie dziŭnaha susieda. Žychary paŭnočnaj Łahojščyny pačali skardzicca na susiedstva jašče ŭ pačatku hoda. Novy haspadar ziamli pačaŭ abharodžvać ziamlu čatyrochmietrovym płotam. Spačatku ad miascovaha nasielnictva zakryli les, a paśla jašče i pieraharadzili raku Dźvinasu. Pa ŭsim pierymietry raźviešanyja zastrašalnyja tablički: «Uvaha! Terytoryja arandavanaja. Prachod i prajezd zabaronienyja». Kali niechta ź miascovych usio ž prabraŭsia ŭ zabaronienuju zonu, to ledź uciok. Kažuć, pa niaprošanych haściach navat stralali.
Achova katarskich abšaraŭ suvoraja. Jaje nabrali nie ź viaskoŭcaŭ, jak zvyčajna robiać u takich situacyjach, a voziać ź Minska. Adstaŭniki siłavych viedamstvaŭ nibyta zarablajuć na takoj pracy vachtavym mietadam pa $2000 za miesiac.
Tym časam u lesie novyja haspadary rasčyścili miesca pad viertalotnuju placoŭku i budaŭnictva bazy, źbirajucca budavać niekalki mastoŭ. A na pieršy ekśpierymientalny ŭčastak užo zapuścili aleniaŭ. Kali jany pryžyvucca, možna budzie pačynać vialikaje katarskaje palavańnie. Ale i ciapier hrybniki čaściakom čujuć streły ź lesu.
Jašče adzin vializny kavałak novaj katarskaj ziamli znajšoŭsia ŭ centry Łahojskaha rajona, kala viosak Juljanava i Zavišynskaja. Adzin z bakoŭ nadzieła idzie pa bierahu toj samaj Dźvinasy i ŭpirajecca ŭ Pleščanickaje vadaschovišča.
I ŭ tym, i ŭ druhim vypadku miascovyja žychary aburalisia niespadziavanym susiedstvam, adnak zrabić ničoha tak i nie zmahli. «Pytańnie pra pieradaču 99 hiektaraŭ ziamli ŭ arendu pradstaŭniku Katara vyrašałasia na ŭzroŭni prezidenta», — cytavaŭ uviesnu pradstaŭnikoŭ Zadorjeŭskaha sielvykankama partał Onliner.by.
Adnak abharodžanaja płošča vidavočna bolšaja za 99 hiektaraŭ.
«Naša Niva» znajšła dakumient, jaki paćviardžaje heta. Jak vyśvietliłasia, 24 krasavika 2013 hoda Łahojski rajvykankam zaklučyŭ damovu №977 arendy ziamielnych učastkaŭ ź inviestycyjnaj kampanijaj «Sokał», jakaja vystupiła pradstaŭnikom Katara. Pavodle dakumienta, araby abaviazalisia štohod płacić pa 2,8 miljarda rubloŭ, pa ciapierašnim kursie heta kala $270 tysiač.
Ale hałoŭnaje — płošča arandavanaj ziamli. Abodva ŭčastki (kala Iźbišča i Juljanava) składajuć razam 3897 hiektaraŭ! Prastora dla palavańnia, a mienavita z hetaj metaj dajecca ziamla, zojmie amal 40 km2. Dla paraŭnańnia, heta piać z pałovaj tysiač futbolnych paloŭ. Albo 20 takich krain, jak Manaka.
Vydzialeńnie hetaj ziamli i jaje dalejšaja zabudova adbylisia biez hramadskaha abmierkavańnia. Ukaz Alaksandra Łukašenki №302 ad 9 lipienia 2012 hoda i pryniataje ŭśled rašeńnie Minabłvykankama №392 ad 10 krasavika 2013 hoda, jakija apisvali praceduru vydačy nadziełaŭ katarcam, byli vydadzienyja pad hryfam «dla słužbovaha karystańnia».
