Biełaruski biznesmen Vital Arbuzaŭ pašyraje supracoŭnictva ź japonskimi inviestarami. Na hety raz kampanija Fenox Venture Capital (FVC), saŭładalnikam jakoj jon źjaŭlajecca, zapuściła 20-miljonny vienčurny fond ź japonskaj Infocom Group.
Novy prajekt atrymaŭ nazvu Fenox Infocom Venture Fund V i budzie kiravacca FVC, havorycca ŭ aficyjnym paviedamleńni. Inviestycyi fondu buduć nakiravanyja ŭ pierśpiektyŭnyja startapy ŭ Paŭnočnaj Amierycy i Paŭdniova-Uschodniaj Azii. Akcent budzie zrobleny na nacielnych technałohijach (wearable technologies), IoT, achovie zdaroŭja i spažyvieckim internecie. Startapy, jakija atrymali finansavańnie ad novaha fondu, buduć mieć dostup da kanałaŭ prodažaŭ Infocom Group u Paŭdniova-Uschodniaj Azii.
Apošniaje — niemałavažny bonus, pakolki Infocom adzin z najbujniejšych udzielnikaŭ japonskaha rynku IT. «Z Fenox Infocom Venture Fund V my zmožam jašče bolš paskoryć našu inviestycyjnuju dziejnaść u Paŭnočnaj Amierycy i Paŭdniova-Uschodniaj Azii», — u svaju čarhu adznačyŭ prezident i vykanaŭčy dyrektar Narychira Tachiekara.
Infocom Group była zasnavana ŭ 1983 hodzie i źjaŭlajecca raspracoŭščykam roznych IT-rašeńniaŭ dla spažyŭcoŭ u telekamunikacyjnaj, miedycynskaj halinach, u adukacyi i navukova-daśledčaj śfiery. Kampanija stvaraje ličbavy kantent dla spažyŭcoŭ i zajmajecca kiravańniem infarmacyjna-kamunikacyjnymi sistemami. U hrupie pracuje zvyš 1,2 tys. čałaviek.
U 2001 hodzie kantrolny pakiet Infocom Group vykupiła adna z najbujniejšych inavacyjnych karparacyj Teijin Limited. Jaje hałoŭnymi napramkami źjaŭlajujecca, akramia raspracoŭki i prasoŭvańnia IT-rašeńniaŭ, vypusk inavacyjnych chimičnych (aramidnaha, vuhlarodnyja vałokny, kampazity) i miedycynskich praduktaŭ. U chołdynh uvachodzić zvyš 150 kampanij, čyja sukupnaja vyručka ŭ 2013 hodzie skłała 7,64 młrd dalaraŭ. Na čale kampanii, zasnavanaj ŭ 1918 hodzie, staić Dziun Sudzuki.
Vital Arbuzaŭ užo viadzie biźnies ź inšaj japonskaj kampanijaj. U 2013 hodzie FVC razam z IMJ Corporation of Japan stvaryła sumiesny biznes u Sinhapury — IMJ Fenox. Jon invieściruje ŭ startapy ŭ Małajzii, Indaniezii, na Filipinach i inšych krainach hetaha rehijonu.
Taksama FVC sumiesna z najbujniejšaj indaniezijskaj kampanijaj u śfiery IT Telcom abviaścili ab zapusku novaj hłabalnaj prahramy pa padtrymcy startap-prajektaŭ pad nazvaj Indigo Fenox. Novaja prahrama pazicyjanujecca ŭ jakaści palepšanaha varyjantu biznes-inkubatara Telcom, viadomaha jak Indigo Incubator. Pa słovach prahramnaha dyrektara prajekta Nika Vidžy, Indigo Fenox zmoža inviestavać u maładyja kampanii 1,5 młn. dalaraŭ štohod. Supracoŭniki Indigo Fenox dvojčy na hod buduć staranna adbirać pa 20 samych šmatspadzieŭnych startapaŭ dla ŭdziełu ŭ 4-miesiačnaj prahramie.
U hetym hodzie daradcam biełaruskaha biznesu staŭ były staršynia hrupy elektroniki japonskaj karparacyi Sony Nabujaki Idei. Čakajecca, što ŭdzieł byłoha top-menedžara Sony u biznesie Arbuzava zabiaśpiečyć pavieličeńnie inviestycyj u japonskija startapy.
FVC była stvorana Arbuzavym i jaho amierykanskim partnioram Anisim Uzamanom u 2011 hodzie. Jaje ofis znachodzicca ŭ San-Chase. Metaj prajekta źjaŭlajecca inviestavańnie na praciahu piaci hadoŭ u 50 pierśpiektyŭnych startapaŭ.
