29-hadovy paŭabaronca biełaruskaj futbolnaj zbornaj Ihar Stasievič 19 studzienia padpisaŭ kantrakt z barysaŭskim BATE, adkul syšoŭ u lipieni 2010 hoda.
Termin dziejańnia pahadnieńnia pres-słužba BATE, zhodna z novaj tradycyjaj, nie nazyvaje.
Stasievič vystupaŭ za barysaŭski kłub u 2002—2010 hadach. Futbalistam hałoŭnaj kamandy jon staŭ u druhoj pałovie siezona-2004.
Za čas pieršaha barysaŭskaha adrezku karjery Stasievič pravioŭ 177 matčaŭ za asnoŭny skład, u jakich zabiŭ 15 miačoŭ i addaŭ 37 vynikovych pieradač (čempijanaty Biełarusi — 118 / 8+29; Kubak Biełarusi — 26 / 3+1; Supierkubak — 1 / 0+0; jeŭrakubki — 32 / 4+7).
Razam z BATE Stasievič piać razoŭ stanaviŭsia čempijonam krainy (2006—2010), dvojčy zavajoŭvaŭ Kubak (2006, 2010) i adzin raz — Supierkubak (2010). «Ihar — u radu najbolš jarkich pradstaŭnikoŭ taho składu BATE, jaki zdabyvaŭ pieršuju pucioŭku ŭ hrupavy turnir Lihi čempijonaŭ, aŭtar adnaho z hałoŭ u epičnym damašnim matčy suprać turynskaha «Juvientusa» (2:2)», — adznačajecca ŭ paviedamleńni pres-słužby kłuba.
Druhuju pałovu siezona-2010 Stasievič abaraniaŭ kolery nižaharodskaj «Vołhi», paśla čaho viarnuŭsia na radzimu i vystupaŭ za «Homiel» (2011) i minskaje «Dynama» (2012—2014). Za čatyry apošnija čempijanaty zhulaŭ 119 matčaŭ, u jakich zabiŭ 19 miačoŭ i zarabiŭ 38 asistenckich bałaŭ. U 2011 i 2014 hadach byŭ lepšym pa kolkaści halavych pieradač (13 i 12 adpaviedna). U 2011 hodzie jon razam z «Homielem» zavajavaŭ Kubak i bronzavyja miedali čempijanatu. U składzie minskaha «Dynama» stanaviŭsia siarebranym (2014) i dvojčy bronzavym (2012, 2013) pryzioram pieršynstva. Pa vynikach minułaha siezona pryznany lepšym futbalistam čempijanatu.
«Kali ščyra, heta zaprašeńnie stała dla mianie šmat u čym niečakanym i vielmi pryjemnym. Chaču padkreślić, što pry padpisańni kantrakta z BATE finansavy faktar nie mieŭ dla mianie pieršaradnaha značeńnia», — zajaviŭ Stasievič u intervju pres-słužbie.
«Budu imkncca stać lidaram kamandy, što nie tak prosta, — skazaŭ futbalist. — Tut usie charyzmatyčnyja chłopcy, jakija pryvykli kožny hod zavajoŭvać załatyja miedali čempijanatu krainy. Ale ja hatovy da kankurencyi, staŭlu pierad saboj zadaču pravieści siezon-2015 bolš paśpiachova, čym papiaredni, dapamahčy rodnamu kłubu dabicca maksimalnych vynikaŭ i na ŭnutranaj arenie, i ŭ jeŭrakubkach… Miarkujecca, što ja prychodžu ŭ kamandu jak futbalist, jaki pavinien stać lidaram jak na poli, tak i za jaho miežami, słužyć prykładam dla moładzi. Pastarajusia hodna vykonvać hetyja funkcyi… Naohuł ža ja ščaśliŭčyk, bo hulaŭ u dvuch vialikich biełaruskich kłubach… Rady, što ŭ kamandu viarnuŭsia Žaŭnierčyk. Vielmi daŭno viedaju Maksa, šmat hadoŭ praviali ŭ BATE. Zdorava budzie znoŭ vystupać razam».
