Jeŭrapiejski humanitarny ŭniviersitet raspaŭsiudziŭ zajavu pra praciah dziejnaści dziela Biełarusi, niahledziačy na źmieny.
«Z samaha zasnavańnia EHU ŭ 1992 hodzie Univiersitet byŭ stvorany i praciahvaje isnavać dziela Biełarusi», — śćviardžajuć aŭtary zajavy.
«Transatłantyčnaja supolnaść donaraŭ padtrymlivaje EHU šlacham finansavańnia pryblizna dźviuch tracin biudžetu Univiersiteta. Jany robiać heta tamu, što vierać u biełaruskuju misiju Univiersiteta, jaki daje adukacyjnuju alternatyvu studentam mienavita ź Biełarusi. Jany taksama vierać u nieabchodnaść dać šaniec našym studentam i vypusknikam, jakija źviarnulisia da EHU pa alternatyvu, što jość adnačasova jeŭrapiejskaj i biełaruskaj», — tłumačać jany.
Praz padtrymku donaraŭ biełaruskija studenty atrymlivajuć źnižku na navučańnie, a častka ich — dadatkovuju finansavuju padtrymku.
Pryvodziacca nastupnyja ličby:
- Bolš za 95% studentaŭ EHU — biełarusy.
- Bolš za 95% asnoŭnaha prafiesarska-vykładčyckaha składu i bolš za 60% administracyjnych supracoŭnikaŭ — biełarusy.
- Bolš za 60% studentaŭ pražyvaje ŭ Biełarusi (tut i dalej pavodle ŭłasnaha apytańnia 2014 hoda).
- Bolš za 90% ź ich śćviardžajuć, što mienavita EHU dapamoh im dasiahnuć pośpiechu.
- Amal 70% ź ich upeŭnienyja, što EHU natchniŭ ich być bolš aktyŭnymi, bolš za 70% — što EHU navučyŭ ich canić biełaruskuju spadčynu.
«Jak i lubaja aktyŭnaja arhanizacyja, EHU źmianiŭsia i praciahvaje mianiacca, — pišuć u zajavie. — Našaja meta — palepšyć jakaść akademičnych prapanoŭ i hramadskich pasłuh. Časam pieramieny vielmi ciažkija i nie nastolki spakojnyja, jak mnohija taho b chacieli. Ale jość niešta, što nikoli nie źmienicca — heta abaviazak, jaki staić pierad EHU: nablizić Biełaruś da Jeŭropy, a Jeŭropu — da Biełarusi».
List padpisany mieniedžaram pa kamunikacyi i kaardynataram pa raźvićci EHU Vilmaj Vienckutanicie.
***
Pryznačeńnie novym rektaram Jeŭrapiejskaha humanitarnaha ŭniviersitetu amierykanca Devida Polika vyklikała nieadnaznačnuju reakcyju va ŭniviersitecie i za jaho miežami. Praciŭniki pryznačeńnia bajacca, što ŭniviersitet zhubić svaju «biełaruskaść».
Pad zvarotam za zachavańnie «biełaruskaha serca» EHU ŭ śniežni 2014 hoda padpisalisia 40 dziejačoŭ hramadstva i kultury. U mai 2015 hoda 57 dziejačoŭ hramadstva i kultury zaklikali stvaryć Nacyjanalny ŭniviersitet u dadatak da EHU.
Čytajcie taksama:
Polik: Deficyt biudžetu EHU 1 młn jeŭra, płanujecca pryciahvać studentaŭ ź inšych rehijonaŭ
EHU na 3-m miescy ŭ rejtynhu najlepšych niedziaržaŭnych univiersitetaŭ Litvy
