Biełarusy pracavityja
Biełarusy zajmajuć takuju ziamlu, dzie nikoli nie było vialikich pryrodnych bahaćciaŭ. Nie ŭ kryŭdu nikomu skazana, ale akurat heta raźviła ŭ nas pracavitaść, upartaść i niastomnaść, našy dobryja nacyjanalnyja rysy.
U nas paradak
U nas čysta, u nas pakošana, ludzi vykonvajuć zakony, biespriedieła nidzie i nikoli nie było, navat u vajennyja časy. Pavahu da prava ŭ biełarusach vychavała pravavaja dziaržava Vialikaje Kniastva Litoŭskaje ź jaje Statutam, napisanym, darečy, pa-starabiełarusku. Darečy, trapnaść i raspracavanaść našaj movy taksama iduć z tych časoŭ.
U nas svaja mova
Da XX stahodździa jana panavała ŭ ludzie, za vyniatkam tych kutkoŭ krainy, dzie žyli inšyja narody. Paśla pieramahła rusifikacyja, ale mova ŭ nas jość, i my jaje lubim. Na joj stvoranyja šedeŭry: ad Skaryny da Bykava, Karatkieviča i «Pieśniaroŭ». I jana viartajecca.
Biełarusy šmatkanfiesijnyja
U Biełarusi kaliści daminavała pravasłaŭje, paśla katalictva, paśla była mocnaja Refarmacyja, paśla bolšaść była ŭnijatami, paśla znoŭ pravasłaŭnymi. Ciapier jość i kataliki, i pratestanty. My takija, my — roznyja. Ale ŭsie my — karennyja biełarusy.
My ŭmiejem prystasoŭvacca
Tak, historyja zrabiła nas hnutkimi. My mianiali movy publičnaj śfiery, pierachodzili z relihii ŭ relihiju, vyžyvali pad roznymi ŭładami. Ale my ŭžo paŭtary tysiačy hadoŭ tut, na adnym miescy. My hniomsia, ale nie łomimsia. A svaju hnutkaść my navučylisia pieratvarać u ekanamičnyja pieravahi.
U nas svaja historyja
Kali Rasija dałučyła Biełaruś, my sapraŭdy ŭdzielničali ŭ tych samych vojnach i pieražyvali tyja samyja biedy. Ale ŭ nas jość i svaja niepaŭtornaja historyja, i vopyt jaje pieradaŭsia z pakaleńnia ŭ pakaleńnie. U nas byli hordaja Rahnieda, svoj Safijski sabor, mudryja pieramohi pad Hrunvaldam i Oršaj. Była šlachta, jakaja nie viedała chałopstva. I byli paŭstańni, hieraizm ludziej typu Kalinoŭskaha. Nas łamali, krucili, dušyli, ale my jość.
My jeŭrapiejski narod
Rasija — jeŭrazijskaja kraina, i hieahrafična, i etnična. Biełaruś — adna z suvymiernych jeŭrapiejskich nacyj. Ciesna źviazanaja z Rasijaj, ale inšaja.