Vystupajučy na pasiadžeńni Biełaruskaj asacyjacyi pramysłovych pradpryjemstvaŭ u Miensku, pieršy vice-premjer Biełarusi Uładzimir Siamaška zrabiŭ šerah zajaŭ nakont raźvićcia biełaruskaj ekanomiki.
Siamaška pryznaŭ, što ŭ Biełarusi "ciažkaja padatkovaja sistema" i padatkovaja nahruzka vyšejšaja za rasiejskuju. "Ale my pastupova źnižajem padatkovuju nahruzku pry tym, što PDV sioleta my nie padniali. I dalej budzie taki samy ruch", – skazaŭ jon, padkreśliŭšy, što ciapier u Biełarusi raspačataja praca pa farmavańni biudžetu krainy na 2009 hod i viedamstvy pavinny ŭnosić prapanovy pa aptymizacyi zakanadaŭčaj bazy. Hetyja prapanovy pavinny być zaniesienyja da krasavika – traŭnia hetaha hoda.
U prahramie impartazamiaščeńnia Biełarusi jość pierahiny
Pieršy vice-premjer Biełarusi Uładzimir Siamaška ličyć, što ŭ Biełarusi dapuskajucca pierahiny ŭ realizacyi dziaržaŭnaj prahramy impartazamiaščeńnia: "U dziesiacimiljonnaj krainie na 100% niemahčyma ŭsio vyrablać u siabie, i ŭ prahramie impartazamiaščeńnia jość pierahiny. Dziaržkantrol ličyć, što ad nita da kančatkovaj pradukcyi treba ŭsio rabić u siabie. Ale heta pierahin".
Jon padkreśliŭ, što Biełaruś pavinna vybudoŭvać kaapieracyjnyja suviazi z pramysłovaściu inšych krain. "Najpierš, mianie chvaluje Rasieja. Jość masa cyvilizavanych mietadaŭ zakryć pastaŭki. Jak heta i atrymałasia z cukram. My ž prapanujem supracoŭnictva i realnuju kaapieracyju. Treba vybudoŭvać narmalnyja ŭzajemaadnosiny z Rasiejaj na ŭzroŭni ŭrada vyrašać pytańnie pramysłovaj kaapieracyi", – ličyć pieršy vice-premjer.
U.Siamaška zaznačyŭ, što siońnia pradstaŭniki bujnoha rasiejskaha biznesu prychodziać u Biełaruś "z punktu hledžańnia niešta kupić, što ŭ Biełarusi drenna valajecca". U.Siamaška ličyć takuju pazicyju niapravilnaj i pierakanany ŭ mahčymaści vybudoŭvańnia raŭnapraŭnych dziełavych stasunkaŭ z rasiejskimi kampanijami.
Palehčycca pracedura praviadzieńnia tenderaŭ
U Biełarusi płanujuć palehčyć praceduru praviadzieńnia tenderaŭ dla prampradpryjemstvaŭ, zajaviŭ U.Siamaška: "Rychtujucca źmianieńni va ŭkaz prezidenta ab praviadzieńni tenderaŭ. Hetyja źmianieńni buduć pryniatyja ciaham miesiaca, i dyrektary buduć mieć mahčymaść sami pravodzić tendernyja zakupy abstalavańnia". Jon adznačyŭ, što ŭ Biełarusi pracedura praviadzieńnia tendernych zakupaŭ abstalavańnia źjaŭlajecca praciahłaj i składanaj i patrabuje ŭzhadnieńnia ŭ šmatlikich ministerstvach i viedamstvach. "Kali na šlachu pieraŭzbrajeńnia pradpryjemstvaŭ staić pieraškoda ŭ vyhladzie tenderaŭ, jakija pravodziacca hadami, hetuju pieraškodu treba likvidavać, i heta budzie zroblenaje ŭ samy blizki čas", –skazaŭ vice-premjer.
