Pretendentka na pasadu prezidenta Biełarusi Iryna Pieršyna, jakaja padała ŭ CVK dakumienty na rehistracyju svajoj inicyjatyŭnaj hrupy, nie budzie rabić nijakich zajavaŭ dla presy. Pra heta paviedamiła BiełaPAN kiraŭnik jaje inicyjatyŭnaj hrupy Maryja Chramcova — dyrektar studyi Imagemaker.
«Tamu što Iryna — prosta vykanaŭca roli pa damovie pradziusiravańnia, jana była adabranaja pa rudym kolery vałasoŭ», — patłumačyła Chramcova.
fota sa staronki Chramcovaj u fejsbuku
Pavodle jaje słoŭ, u inicyjatyŭnuju hrupu Pieršynaj ŭvajšli 100 čałaviek. Chramcova zapeŭnivaje, što kamanda Pieršynaj hatovaja iści da kanca i kandydaturu zdymać nie płanuje. «Klučavyja punkty našaj pieradvybarnaj kampanii — stvaryć u Biełarusi elektronny ŭrad, zrabić Minsk transpartnaj stalicaj śvietu, a taksama ŭvieści biaźvizavy režym dla ŭsich žadajučych naviedać našu krainu», — paviedamiła Chramcova.
Na jaje dumku, u Iryny Pieršynaj kankurentaŭ na vybarach niama. «My prapanujem całkam novyja idei. Kali budzie stvorany elektronny ŭrad, stanie niavažna, chto budzie prezidentam, a chto — premjer-ministram. Hetyja pasady naohuł bolš nie spatrebiacca», — ličyć kiraŭnica inicyjatyŭnaj hrupy pretendenta na pasadu prezidenta.
Maryja Chramcova admaŭlaje, što kamanda Pieršynaj vykarystoŭvaje pieradvybarčuju kampaniju, kab prarekłamavać studyju Imagemaker. «Naša meta — całkam źmianić ład dziaržaŭnaha aparatu ŭ Biełarusi, i my hatovyja iści da kanca. Zdymać kandydaturu ja liču niekarektnym u adnosinach da vybarščykaŭ», — zajaviła Chramcova.
Jana taksama paviedamiła, što inicyjatyŭnaja hrupa nie płanuje źbirać podpisy «standartnym čynam». «U nas nie budzie nijakich płakataŭ i pikietaŭ. My adpravim pa elektronnaj pošcie farmulary patencyjnym vybarščykam. Jany sami pavinny buduć zapoŭnić papiery i viarnuć nam, kab my padali ich u Centrvybarkam», — skazała Chramcova.
Pavodle jaje słoŭ, Pieršyna nie kryŭdzicca, što ŭ internecie jaje nazyvajuć «kandydatam-frykam». «Pa sutnaści, heta tak i jość, — kaža Maryja Chramcova. — My ž nie stavim sabie kankretnyja palityčnyja mety».
Jak paviedamlałasia raniej, dakumienty na rehistracyju inicyjatyŭnaj hrupy pa vyłučeńni kandydatam u prezidenty Biełarusi Iryny Pieršynaj pastupili ŭ Centrvybarkam ŭviečary 16 lipienia. Pra asobu Pieršynaj nieviadoma ničoha, akramia taho, što jana śpiecyjalist pa rekłamie.
